चेल्सी प्रशिक्षक लाम्पार्ड बर्खास्त
पोहेलाथ्व त्रयोदशी ११४१, माघ १३ मंगलवाः
इंग्लिस फुटबल क्लव चेल्सीं प्रशिक्षक फ्रांक लाम्पार्डयात बर्खास्त याःगु दु । चेल्सीं लिपांगु इलय् लगातार बांमलाःगु कासा क्यनेधुंकाः प्रशिक्षक लाम्पार्ड बर्खास्तीइ लाःगु खः ।
इंग्लीश प्रिमियर लिगय् ९गूगु थासय् दुगु चेल्सीं लिपांगु ८ मध्य् न्यागू कासा बूगु दु । थः बर्खास्त जुइगु खबर पिहां वयेधुंकाः लाम्पार्ड म्हिगःया टिमया नियमित प्रशिक्षणय् मथ्यंगु खः ।
लाम्पार्डया थासय् आः फ्रेन्च क्लब पेरीस सेन्ट जर्मेन (पीएसजी)या पूर्व प्रशिक्षक थोमस टुचेलयात हयेगु तयारी जुयाच्वंगु दु । रुसी धनाढ्य रोमन अब्रामोभिचं क्लव कःघायेधुंकाः बर्खास्तीइ लाःम्ह लाम्पार्ड १०म्हम्ह खः ।
एफए कप अन्तर्गत आइतबाः जूगु लुटन टाउन विरुद्धया कासा चेल्सी प्रशिक्षकया रुपं लाम्पार्डया लिपांगु कासा जूगु दु ।
क्लवया पुर्व कासामि तकं खःम्ह लाम्पार्डं थुगु सिजनय् न्हूम्ह कासामिया लागिं २सःत्या मिलियन पाउण्ड खर्च याःगु खः । तर खर्च कथं कासामितपाखें लिच्वः खनेमदय्धुंकाः क्लब व्यवस्थापन वय्कःलिसे सन्तुष्ट मदयाच्वंगु खः ।
Categorized in कासा
