लिभरपुलं टोटनह्याम हट्सपरयात ३–१ बुकल
पोहेलागा पारु११४१, माघ १६ शुक्रवाः
इंग्लीश प्रिमियर लिग फुटबलय् लिभरपुलं टोटनह्याम हट्सपरयात ३–१ बुकूगु दु ।
टोटनह्यामया ख्यलय् वंगु चान्हय् जूगु कासाय् पाहां टोली लिभरपुलयात त्याकेत रोबर्टो फर्मिनो, ट्रेन्ट अलेक्जेण्डर आर्नोल्ड व सादियो मानें १÷१ गोल यात । टोटनह्यामया होएबर्गं १ गोल लितबिल ।
कासाया सुरुइ हे टोटनह्यामया ह्युङ मिन सनं पेनाल्टीया ह्वःताः सितिं छ्वःगु खःसा ५६गूगु मिनेटय् लिभरपुलया मोहोमद सालाहं नं पेनाल्टी ह्वःतालय् गोल यायेमफुत ।
थुगु कासा धुंकाः लिभरपुल २० कासां ३७ ल्याः मुंकाः प्रिमियर लिगया प्यंगूगु थासय् थहांवंगु दु । लिभरपुल शिर्ष थाय्या म्यान्चेस्टर सिटी स्वयां ४ ल्याखं ल्यूने दु ।
छगू कासा म्ह्वः म्हितूगु म्यान्चेस्टर सिटीया ४१ ल्याः जूबलय् ४० ल्याःलिसें म्यान्चेस्टर युनाईटेड निगूगु अले ३९ ल्याः मुंकूगु लेष्टर सिटी स्वंगूगु थासय् दु ।
Categorized in कासा
