थौं १५क्वःगु लोकतन्त्र दिवस
लहानान्युज | चौलाथ्व द्धादशी ११४१,बैसाख ११ सनिवाः
थौं लोकतन्त्र दिवस । हिउपाया नारा थ्वगु दिंया कथं वैशाख ११ यात दँय्दसं नेपाली जनतां थः त्यागु दिंया कथं लुमंकेगु याः ।
२०६२÷०६३ खय् जूगु १९न्हूया जनआन्दोलनया जगय् जूगु राजनीतिक हिउपाया हना कथं थौं लोकतन्त्र दिवस हनेत्यंगु खः । तत्कालीन ७गू राजनीतिक दल व विद्रोही नेकपा (माओवादी)या मंका ब्वनाय् राजतन्त्रयात क्वचायेकेत उगु दिंया महत्वपूर्ण भूमिका दु । उगु हे दिंया लुमन्तिइ थौं १५क्वःगु लोकतन्त्र दिवस देयेयंक थी थी ज्याझ्वया ग्वसाःग्वःया हनेज्या जुयाच्वंगु दु ।
तत्कालीन जुजु ज्ञानेन्द्र शाहं विघटित प्रतिनिधिसभाया पुनःस्थापना याना राजनीतिक दलं च्वःगु मार्ग चित्र कथं न्ह्यज्यायेगु घोषणा याःगु खः । उगु हे घोषणा कथं पुनःस्थापित संसद्या जेठ ४ गतेया मुँज्यां राजसंस्थायात निलम्बन याना कार्यवाहक राष्ट्राध्यक्षया अधिकार तकं प्रधानमन्त्रीयात बिल ।
शान्तिपूर्ण सडक आन्दोलन याना वःगु ७गू राजनीतिक दल व सशस्त्र ल्वापुइ दूगु तत्कालीन नेकपा (माओवादी) दथुइ जूगु १२ता खँया सहमतिं नेपाली जनताय् छगू कथंया भलसा ब्वलंकुगु खः । नेपाली जनताया तःधंगु त्याग व वलिदानं चूलागु हिउपायात संविधानसभापाखें जनतां थःगु संविधान दयेकुगु खः ।
संविधानसभापाखें २०७२ असोज ३ गते जनताया प्रतिनिधि थःपिन्सं हे च्वःगु संविधान जारी जुल । नेपाली जनतां थःगु राष्ट्रप्रमुख थःपिन्सं हे ल्येय्दइगु गणतान्त्रिक व्यवस्था अबलम्वन जूगु दु । निक्वःगु जनआन्दोलनं संघीयता, समावेशिता, समानुपातिक प्रतिनिधित्व, धर्मनिरपेक्षता थेंज्यागु नेपाःया मौलिक विशेषता नापंया प्रणालीयात स्थापित याःगु दु ।
राज्यया हरेक तगिंमय् ३३गू प्रतिशत मिसाया ब्वतियात सुनिश्चित याःगु दु । लिउने लाःगु वर्ग, क्षेत्र, तह व तप्कायात राज्यया मू प्रवाहलय् हःगु दु । ७गू प्रदेश व अधिकार सम्पन्न ७सः व ५३गू स्थानीय तगिंपाखें जनतां गाँमय् हे सिंहदरबारं चूलाइगु सेवा व सुविधा चूलाकुगु दु ।
विसं २०६३ वैशाख ११ गते धायेकि थौंया हे दिं जुजुपाखें लाकाकाःगु अधिकार जनआन्दोलनया शक्तिया हुनिं चूलागुलिं लोकतन्त्र दिवसया महत्व दु । थ्वहे दथुइ राजनीतिक व्यवस्था हिलेज्या जूसा न ं आम नागरिकया गुलिखय् न्यूनतम आवश्यकता नं राज्यं पूवंके फूगु मदुनि ।
