थुगुसीया बाल दिवसयात उत्सवया रुपं हनीगु जूगु दु । जाउलाख्यःस्थित लभ्ली होम प्रिस्कूलं वइगु भाद्र २९ गते शनिबाः राष्ट्रिय बाल दिवसया दिंयात उत्सवया रुपं हनेगु धाःगु खः ।

मंगलबाः लभ्ली होमं यलय् पत्रकार सम्मेलन यासें थीथी सांस्कृतिक ज्याझ्वः व विद्यार्थीतय् नितिं कासा गतिविधिलिसें यल जाउलाख्यःया खेल मैदानय् बाल दिवस मेला २०८१ या ग्वसाः ग्वयेत्यनागु जानकारी ब्यूगु खः ।

लभ्ली होम प्रिस्कूलया संस्थापक माहेश्वरी अमात्यं थीथी कासा, सांस्कृतिक व मेमेगु गतिविधिलिसें छगू उत्सवया रुपं मेलाया ग्वसाः ग्वयेत्यनागु धयादिल ।

फाडर्स डे, मडर्स डेयात उत्सवया रुप बीपिं मचातय् बाल दिवसयात जक छाय् उत्सवया रुपं महनेगु धकाः नं अमात्यं न्ह्यसः थनादिल ।

‘मांया दिनयात अबुयात दिनयात गुलि नुगः तयाः मचातयसं छगू उत्सवया रुप बी तर, व हे मचातय् दिंयात धाःसा मनूतयसं उलि वास्ता याइमखु । मचातय् बाल दिवसयात जक झीसं छाय् उत्सव कथं महनेगु’ संस्थापक अमात्यं धयादिल ।

ज्याझ्वलय् मेमेगु मनोरन्जनात्मक न्ह्यब्वयालिसें पुस्तान्तरणया माध्यम कथं विद्यार्थीतयसं ज्याझ्वलय् लाखेय्, पुलुकिसिया प्याखं तकं न्ह्यब्वइगु जानकारी लभ्ली होमया डान्स कोअर्डिनेटर सुजन बज्राचार्यं बियादिल ।

उगु हे पत्रकार सम्मेलनय् यल लायकू मिप्वाः लाखय् पुचःया संरक्षक उत्तम रत्न शाक्यं मूल मर्म दुने च्वनाः लाखेय् लिसेंया स्थानीय संस्कृति विद्यार्थीतय् मार्फत पुस्तान्तरण यायेगु बांलाःगु विषय जूगु बिचाः तयादिल ।

‘विद्यार्थीतयसं लाखय् प्याखं ल्हुइबलय् उमिसं लाखयया बारे सीकी, सयेकी, थुइकी । लालाःथाय् प्याखं ल्हुकाः दुरुपयोग जकं यायेमजिल, भविष्यया कर्णधारतयत संस्कृति स्यनेगु ला बांलाःगु खँ खः’ संरक्षक शाक्यं धयादिल ।

ज्याझ्वलय् थीथी सांस्कृतिक गतिविधिलिसें कार्यक्रमया मू आकर्षणया रुपं निशा देसार व रोजमान महर्जनया न्ह्यब्वया नं दइगु जानकारी पत्रकार सम्मेलनय् ब्यूगु खः ।

लिसें थीथी नसा ज्वलंया स्टल, कासा गतिविधिलिसें सुथसिया ११ताः इलंनिसें सनिलया ४ताः ईतक मेला जुइगु जानकारी ग्वसाः खलकं ब्यूगु दु ।

Categorized in राष्ट्रिय