माधव पुचलं न्ह्यसःलिसेंया स्पष्टीकरण बीगु
चिल्लाथ्व एकादशी, ११४१, चैत्र १२ विहीबाः
एमाले वरिष्ठ नेता माधवकमार नेपाल पक्षं प्रधानमन्त्री अले पार्टी नायःयात न्ह्यसःलिसेंया स्पष्टीकरण बीगु तयारी याःगु दु ।
लिसःया रुपं पार्टी नायः केपी ओलीपाखें जुयावःगु ज्याखँ, केन्द्रिय कमिटिया लिपांगु निर्णय व उकिया बैधानिक हैसियतय् न्ह्यसः थनेगु नेपाल पक्षीय नेतातय्सं धाःगु दु । स्पष्टीकरणया विषयस बिचाः दयेकेत म्हिगः न्हिछि सहलहस जाःपिं नेपाल पक्षया नेतात निर्णयलय् धाःसा थ्यनेमफुत ।
ओलीयात बिस्कं बिस्कं या मंकाः रुपं लिसः बीगु धइगुबारे उमिदथुइ सहमति मजूनि । ओलीं मू छ्यान्जे ईश्वर पोखरेलमार्फत नेकपाय् च्वनाबलय्या व एमालेय् वयेधुंकाःया ज्याखँयात लिधंसा दयेकाः पार्टी विधान हाचां गाःगु द्वपंलिसें नेता नेपाल, भीम रावल, सुरेन्द्र पाण्डे व घनश्याम भुसालयात छुं मंकाः व छुं बिस्कं बिस्कं न्ह्यसःलिसें स्पष्टीकरण पौ छ्वःगु खः ।
पतिइ उमित तत्कालीन नेकपाया नायः पुष्पकमल दाहाल ‘प्रचण्ड’या मतियार जूगुनिसें ओलीविरुद्ध षड्यन्त्र याःगु व पार्टी विभाजनया लागिं ज्या याःगु द्वपं ब्यूगु दु । स्वन्हु दुने बीमाःगु स्पष्टीकरणया म्याद म्हिगः फूसां थौं तँसा सहलह यायेधुंकाः लिसः बीगु नेपाल पक्षया तयारी दु ।
