“ओलीया आःया फुइँ धयागु प्रधानमन्त्रीया कुर्सीइ च्वंतले जक ख” : नेता माधव नेपाल
चिल्लाथ्व दशमी, ११४१, चैत्र ११ बुधबाः
नेकपा एमालेया वरिष्ठ नेता माधवकुमार नेपालं पार्टीया नायः केपी शर्मा ओलीयात पार्टी त्वतावनेत धयादीगु दु ।
नेता नेपालयात एमालेया संस्थापन पक्षं पुष्पकमल दाहाल प्रचण्डया मतियार जुयाः पार्टीया हित अःखः ज्या याःगु द्वपं ब्यूगु कन्हय्कुन्हु वय्कया थन्यागु न्वचू सार्वजनिक जूगु खः । थःलिक्कया विद्यार्थीतय्गु ज्याझ्वलय् वरिष्ठ नेता नेपालं नायः ओलीया विषयस खँ तयादीगु खः । वयकलं धयादिल “नेकपा एमाले जिमिगु पार्टी खः, ओली एमाले मखु बीमाले सीमाले खः उकिं थ्व पार्टी त्वता हुँ” ।
नेता नेपालं नायः ओलीं थःके स्पष्टिकरण न्यंसां मग्यानागु धयादीगु दु । उकियात पाय्छि लिसः बीगु वय्कया धापू खः । नेता नेपालं मैदान त्वःत मवनेगु धासें पार्टी न तमछ्यायेगु धयादिल ।
ओलीया आःया फुइँ प्रधानमन्त्रीया कुर्सीइ च्वंतले जूगु वय्कया धापू दु । नेता नेपालं प्रधानमन्त्री ओली व थःदथुइया संघर्ष प्रवृति व विचारया जूगु न धयादिल । ज्याझ्वलय् एमालेया न्वकू डा. भीम रावलं नेपाली जनतां केपी शर्मा ओलीयात स्पष्टिकरण न्यनेगु ई वःगु धयादिल । वय्कलं स्पष्टिकरण थःपिन्त मजूसें पार्टीया नायः ओलीयाके न्यनेमाःगु धयादीगु खः ।
प्रतिनिधिसभा विघटन यायेगु, एमसीसी थें जाःगु वितण्डात न्ह्यज्याकाः, नागरिकता विधेयकयात प्रतिनिधिसभाय् पारित मयाकूगु हुनिं नायः ओलीयाके नेपाली जनतां स्पष्टिकरण न्यनेमाःगु न्वकू सावलया धापू दु ।
रावलं गुक्वःगु महाधिवेशनया निर्णयया लिधंसाय् दयेकूगु विधानयात न्हुयाः संशोधन यायेगु अधिकार नायः ओलीयात सुनां बिल धकाः न्ह्यसः तकं छुनादिल ।
