२०७७ माघ ५, सोमबार

मनाङय् नःगु मिं अझं स्याय् मफुनि

डंगोल | चर्तुदशी, थिंलागा ११४१ (२०७७ पौष २८ गते) मंगलबाः

हिमाली जिल्ला मनाङया चामे गाउँपालिका–२ थानचोकया वनं मङ्सिरनिसें च्याःगु मिं आःतक्क नं स्याय् फुगु मदुनि ।
सल्लोया जङ्गल, गंगु घाँय्, सिमाकचाय् च्याना न्येनावंगु मियात आतक्क नं कजय् काय् थाकूगु खः । आः वया नासो गाउँपालिका–८ ताचै तक्क थ्यंगू खः ।
मिं नया आतक्क सुनं मनूतय्गु क्षति मजुसा नं जडिबुटी व वन्यजन्तुतय्त गुलि असर यात धैगु छुं ल्याःचाः मदुनि ।
मिंनःगु क्षेत्र लमजुङया सदरमुकाम बेसीशहरनिसें ५५गू किलोमिटर व सदरमुकाम चामेनिसें १घौ दूरीं तापाः । प्रशासनं मिं कजय् काय्ता वास्ता मयाबलय् द्वलंद्वः हेक्टर जंगल सखाप जूगु दु ।
थ्वः क्षेत्र अन्नपूर्ण संरक्षण क्षेत्रया संरक्षण लाना च्वंगु खः । 
मिंनःगु जंगलय् थार, थार, घोरल, कस्तुरी, मृग, हिउँचितुवा थें जाःपिं वन्यजन्तु र पाँचऔँले, निरमसी, कुट्की, पदमचाल, यार्सागुम्बा आदि जडीबुटी दइगु थाय् खः ।
मिं न्येना वंबलय् लिकसं च्वंगु ताचै गाँ जोखिमय् लाःगु दु । ताचै गामय्  ६०गू परिवारत च्वना वयाच्वंगु दु ।
उगु थासय् १लाः जक  प्रशासनया उपस्थिति दइगु जूगुलीं स्थानीयवासीतय्सं हारगुहार यासांतबी नं प्रशासनं वास्ता मयाःगु स्थानीयतय्गु धापू दु ।
मिं न्येना मानव बस्ती जोखिमय् लाय्धुंका जक प्रशासनं वाःचायेकुगु खनेदु । 
Categorized in राष्ट्रिय