प्रधानमन्त्री केपी शर्मा ओलीं मन्त्रिपरिषद बैठक सःतूगु दु। ओलीं थौं ५ बजे मन्त्रिपरिषद बैठक सःतूगु दु धका वयागु सचिवालयं धाःगु दु ।

बैठकपाखे प्रतिनिधिसभाया बैठक आह्वान यायेत राष्ट्रपति विद्यादेवी भण्डारीसमक्ष सिफारिस यायेगु तयारी दु । सरकारया सिफारिसय् राष्ट्रपतिं संसद बैठक आह्वान व अन्त्य याइगु संवैधानिक व्यवस्था दु । प्रधानमन्त्री केपी शर्मा ओलीया सिफारिसय् राष्ट्रपति भण्डारीं वःगु पुस ५ गते संसद विघटन याःगु खः ।

तर सर्वोच्च अदालतं थ्व हे फागुन ११ प्रतिनिधिसभा विघटन याःगु ओलीया पलायात असंवैधानिक ठहर याःगु खः । नाप सर्वोच्चं १३ दिं दुने संसद बैठक आह्वान यायेत सरकारयात आदेश बिःगु खः।

उगु आदेश कथं वइगु २३ गते दुने संसद बैठक आह्वान यायेमाः । बिहीबार जक राष्ट्रपति भण्डारीनाप प्रधानमन्त्री ओलीं परामर्श काःगु खः।

Categorized in राजनीति