प्रिमियर लिगय् म्यानयूया किर्तीमानी जित
पोहेलागा षष्ठी ११४१, माघ २१ बुधवाः
इंग्लीश प्रिमियर लिग फुटबलय् म्यान्चेस्टर युनाईटेडं साउथह्याम्पटनयात ९–०या गोल अन्तरं बुकुगु दु ।
प्रिमियर लिगया इतिहासय् म्यान्चेस्टर युनाईटेडं दक्वःलय् तःधंगु गोल अन्तरं त्यागुया किर्तीमान ज्वलिन्ज्वः याःगु खः ।
वंगु चान्हय् थःगु हे ख्यःलय् जूगु कासाय् म्यान्चेस्टर युनाईटेडया नितिं एन्टोनी मार्टियलं निगू गोल याःबलय् आरोन वान बिसाका, ब्रुनो फर्नान्डेज, एडिन्सन काभानी, मार्कस रास्फोर्ड, स्कट म्याक्टोमनी व डेभिड जेम्सं छगू छगू गोल याःगु खः । साउथह्याम्पनया बेड्नारेकं छगू आत्माघाति गोल याःगु खः । कासा त्यागु नापं म्यान्चेस्टर युनाईटेडं शिर्ष थाय्या म्यान्चेस्टर सिटीलिसे ल्याः ज्वलिन्ज्वः याःगु दु ।
२२गू कासां म्यान्चेस्टर युनाईटेडया ४४गू ल्याः दयेकुगु दुसा निगू कासा म्हो म्हितूगु म्यान्चेस्टर सिटीया नं ४४ गू ल्याः हे जूगु दु ।
प्रिमियर लिगय् वंगु चान्हय् वुल्भरह्याम्पटन वान्डरर्सं आर्सनलयात २–१गूया गोल अन्तरं बुकल । डिफेन्डर लुइज व गोलरक्षक लेनों ह्याउँगु कार्ड नयेधुंका ९ म्ह कासामिइ लिकुंगु आर्सनल कासाय् लिहाँवयेमफुत ।
वुल्भरह्याम्पटन त्यागुलिइ रुबेन नेभेस व हुवाँ मौटिनों छगू छगू गोल याःगु दु । आर्सनलया नितिं निकोसल पेपें न्हापांगु गोल याःगु खः ।
प्रिमियर लिगया हे मेगु कासाय् शेफिल्ड युनाईटेडं वेष्ट ब्रोमयात २–१गूया गोल अन्तरं बुकुबलय् क्रिष्टल प्यालेसं न्युकासल युनाईटेडयात २–१गू या गोल अन्तरं बुकल ।
Categorized in कासा
