२०८० चैत्र १६, शुक्रबार

युनाईटेडयात बुकल शेफिल्ड युनाईटेडं

पोहेलाथ्व पुन्हि ११४१, माघ १५ बिहीवाः

इंग्लीश प्रिमियर लिग फुटबलय् म्यानचेस्टर युनाईटेडयात शेफिल्ड युनाईटेडं बुकुगु दु । वंगु चान्हय्  म्यान्चेस्टर युनाईटेडया हे ख्यःलय् जूगु कासाय् पाहाँ टोली शेफिल्ड २–१लिं त्यागु खः ।
लिग धलःया लिउने दूगु शेफिल्डलिसे बुइधुंका म्यान्चेस्टर युनाईटेडं शिर्ष थासय् थाहाँवनेगु ह्वता त्वफिकुगु दु । कासाय् शेफिल्डयात त्याकेत किन ब्रायन व ओलिभर बुर्कें छगू छगू गोल याःगु खः  ।
म्यानयूया नितिं ह्यारी म्याग्वेरं छगू गोल याःगु खः । वंगु चान्हय् जूगु मेगु कासाय् चेल्सीयात वुल्भरह्याम्पटन वान्डरर्सं गोल मयासें ज्वलिन्ज्वःलय् पंगु दु  ।
फ्राङ्क लाम्पार्ड बर्खास्त जुइधुंका न्हूम्ह प्रशिक्षकया भाला काःम्ह थोमस टुकेल न्हापांगु कासा त्याकेत ताःमलाःगु दु ।
वंगु चान्हय् लेष्टर सिटी व एभर्टनं  १–१गू गोलया ज्वलिन्ज्वः म्हितुबलय् बर्न्लें एस्टन भिल्लायात ३–२गू गोल अन्तरं बुकुगु दु । वंगु चान्हय्सिया कासा लिपा प्रिमियर लिगया ल्याः धलःखय् १९गू कासां ४१गू ल्याः मुना म्यान्चेस्टर सिटी शिर्ष थासय् दु । छगू कासा अप्वः म्हितूगु म्यान्चेस्टर युनाईटेड ४० गू ल्याः नापं निगूगु थासय् दूबलय् ३९गू ल्याः मुंकुगु लेष्टर सिटी ३गूगु व ३५गू ल्याः दूगु वेष्ट ह्याम युनाईटेड ४गूगु थासय् दु  ।
Categorized in कासा