इपीएलय् म्यानयू नं बुकल ब्राइटनयात
चिल्लागा नवमी ११४१,चैत्र २३ सोमवाः
इंग्लीश प्रिमियर लिग फुटबलय् म्यान्चेस्टर युनाईटेडं ब्राइटनयात २–१गूया गोल अन्तरं बुकुगु दु ।
वंगु चान्हय् थःगु हे मैदानय् जूगु कासाय् म्यान्चेस्टर युनाईटेडयात त्याकाबिइत मेसन ग्रिनउड व मार्कस रास्फोर्डं छगू छगू गोल याःगु खः । बूगु टोली ब्राइटनया ड्यानी वेलबेकं न्हापांगु गोल याःगु खः ।
प्रिमियर लिगया हे मेगु कासाय् टोटनह्याम हट्सपरयात न्युकासल युनाईटेडं २गू–२गू गोलया ज्वलिन्ज्वःलय् दिकुगु दु । वंगु चान्हय् साउथह्याम्पटनं बर्न्लेयात ३–२गूया गोलं बुकुबलय् एस्टन भिल्लां फुल्हमयात ३–१गूया गोलं बुकल ।
इंग्लीश प्रिमियर लिगय् वंगु चान्हय्सिया कासालिपा ३१गू कासां ७४ गू ल्याः मुंकुगु म्यान्चेस्टर सिटी शिर्ष थासय् दु । ३०गू कासापाखें ६०गू ल्याः दयेकुगु म्यान्चेस्टर युनाईटेड निगूगु थासय् दूबलय् ३गूगु थासय् दूगु लेष्टर सिटीया ५६गू ल्याः दु ।
५१ गू ल्याः मुंकुगु चेल्सी ४गूगु थासय् दुसा ५गूगु थाय्या टोटनह्यामया ४९गू ल्याः जूगु दु ।
