दक्व माँभाय्यात सरकारी कामकाजया भाय् दयेकेत नागरिकपिनिगु मार्चपास
लहनान्युज | सिल्लागा चःह्रे ११४१, फागुन २८ शुक्रवाः
मातृभाषायात सरकारी ज्याय् छ्यलेत माग यानाः यलय् ब्वज्या याःगु दु । ‘मातृभाषा मार्च’ धकाः नां ब्यूगु ब्वज्याय् थीथी भासं च्वयातःगु ब्यानर ज्वनावःगु खः ।
नेपाःया संविधानया प्रस्तावनाय् बहुभाषा, बहुजाती, बहुधार्मिक उल्लेख जूगु अले संरचना तकं संघीयताय् वनेधुंकूगु अवस्थाय् भाषा संरक्षण जुइमाःगु माग यानाः मातृभाषा मार्च याःगु खः ।
बृहत् नागरिक आन्दोलन, उपत्यकाव्यापी सडक विस्तार संघर्ष समिति, भाषिक अधिकार संघर्ष समिति, आदिवासी जनजाति महासंघनाप छगु दर्जन मल्याक संघसंस्थां एकीकृत रुपय् मार्च याःगु खः ।
मार्चलिपा ग्वसाःग्वगु सभायात सम्बोभन यायेगु झ्वलय् उपत्यकाव्यापी सडक विस्तार संघर्ष समतिया नायः सुमन साय्मिं सरकारं सेना व प्रहरी छ्यलाः नेवाः सभ्यता विस्थापन यानाः अस्तित्व न्हंकेत्यंगु द्वपं बियादिल ।
थःगु मातृभूमिइ थःगु हे मांभासं खँ ल्हानाबलय् सरकारं मुद्दा तःगुप्रति कुंखिनादिल । खय्त न निवाः न्ह्यः बालाजुया प्रहरी वृत्तय् मांभासं खँ ल्हाःगु त्वह चिनाः सुमन सायमिनापया पुचःयात मुद्दा तःगु खः । भलै न्यायालयं सुमन साय्मिनापया पुचःयात ज्वनाः मुद्दा तयेमाःगु कारण मदु धकाः धायेधुंकूगु दु ।
ज्याझ्वलय् शोभा सुनावार, अंकला बराम, अन्जु राजवंशी, मुक्तान थेबा, राकेश बुढामगर, सोनाम याङ्की, इम्तियाज वफा, राजभाइ जकःमि नापंयापिन्सं थथःगु भासं चिनाखँ ब्वनाः न्यंकूगु खः ।
सभाय् वाचन याःगु चिनाखं मातृभाषा हे जीवनया लिधंसा खः धकाः हसना ब्यूगु दु । भाषिक अधिकारया पक्षय् च्वयातःगु उपिं चिनाखँ सभाय् ब्वनाःन्यंकूगु खः । यलया पूच्वं न्ह्यानाः मंगलय् तक थ्यंगु ब्वज्याय् नेपालभाषाया जनकवि दुर्गालाल श्रेष्ठ, च्वमि खगेन्द्र संग्रौला, तुलानारायण शाह, अमृत योन्जन, अरुणदेव जोशी, बालकृष्ण माबुहाङनापंया अभियन्तापिं न दुथ्याःगु खः ।
ज्याझ्वलय् जनकवि दुर्गालाल श्रेष्ठ भौतिक रुपं ब्वति मकाःसां थःगु पूर्ण समर्थन दुगु धयादीगु खः ।
