निन्हु न्ह्यः २१ फेब्रुअरीया दिनस झीसं अन्तर्राष्ट्रिय मातृभाषा दिवस हना । अथे हे वंगु माघ ८ गते सामाजिक न्याय दिवस, वयां छन्हु न्ह्यः फागुन ७ गते ला प्रजातन्त्र दिवसया नापनापं निर्वाचन दिवस नं ।

फागुन २ गते फेब्रुअरी १४ या दिं लाकाः प्रणय दिवस, अथे फागुन १ गते फेब्रुअरी १३ या दिं लाकाः विश्व रेडियो दिवस । १ गतेनिसें स्वय्बलय् थौंतक्क झिंछन्हुया दुने झीसं खुगू दिवस हनेधुन । दच्छियंक स्वल धाःसा ला सखे न्हिं छगूया ल्याखं धइथें दिवस लाः वयाच्वनी जुइ । थुगु दिवसतय् धलःया दुने संचार क्षेत्रलिसे सम्वन्धित जूगु ल्याखं विश्व रेडियो दिवस अले देय्या प्रजातन्त्रलिसे स्वानाच्वंगु ल्याखं प्रजातन्त्र दिवस महत्वपूर्ण जू सा झी थःगु मांभाय्प्रति सम्मान तइपिनिगु नितिं मातृभाषा दिवस दक्कले महत्वं जाःगु दिवस जुइफु ।

थुलि खँया दुने झीसं विश्व रेडियो दिवसय् रेडियोया विकासय् छु गुकथंया योगदान बी फत ? अथवा थौंया अवस्थाय् प्रजातन्त्र दिवसया गुलित औचित्य दु ? उकिया नापं छु थःगु मांभाय् त्वःताः ‘म नेवारी कुरा बुझ्छु, बोल्न आउँदैन’ धका गर्वसाथ धाइपिं नेवाःतय्सं मातृभाषा दिवस कुन्हु छन्हु जक सां नेवाः भाय् ल्हाय्फत ला ? मेगु ला खँ त्वःते, अन्तर्राष्ट्रिय मातृभाषा दिवसया दिनय् सामाजिक संजालय् नेवाःतय् गर्व स्वय्बहःजू । मातृभाषा दिवसया भिंतुना बियाच्वन खय् भासं । ‘अन्तर्राष्ट्रिय मातृभाषा दिवसको शुभकामना, मातृभाषा बचाऔं, मातृभाषाको संरक्षण गरौं’ धकाः नेवाःतय्सं हे सामाजिक संजालय् मातृभाषा दिवसप्रति गर्व ब्वयाच्वन ।

आः थुकिइ गर्व ताय्माःगु खः कि लज्जाबोध जुइमाःगु खः ?जात्रा न्याय्के न्ह्याः, रथ साले न्ह्याः, छ्वय्ला नय् न्ह्याः, तपाः लँ सुरुवाः फी न्ह्याः, हाकु पतासि सिने न्ह्याः तर नेवाः भाय् ल्हाय् मयःपिनिगु ल्याः म्ह्वः मजू । जातीय समुदायया दक्कले तःधंगु पहिचान धइगु हे भाय् खः । खय् भाय्, अंग्रेजी भाय् वा मेगु न्ह्यागु भाय् ल्हाःसां मनूया म्यें हे वया जातीय पहिचान बियाबी । वयागु नवायेगु पहलं वयागु जातीय पहिचान न्ह्यब्वयाबी । भाय् तनकि सम्वन्धित जातीय समुदायया पहिचान तन धकाः थुइकूसां ज्यू ।

भाय् ल्हाय्मसःगुयात बांमलाःगु खँ मधाय्, सय्केगु कुतः मन्त कि व बांमलाःगु खँ जुल । उकिया नापं कुतः यात धाःसा छु जक सय्के मफइगु दु धकाः ।सार्वजनिक रुपं नेवाः भाय् ल्हाय् मसः धकाः गर्व साथ धाय्गु त्वःते । भनेर ल्याएको, गरेर ल्याएको गएर पठाउँछु धकाः खँ ल्हानाः मलाई नेवारी राम्ररी आउँदैन मधाय् । छुं नं भाय् पुरापुर शुद्ध सुनां नं ल्हाय् फइगु मखु, गथे वः अथे नेवाः भाय् ल्हानावनकि बांलानावनी । भाय् ल्हाय्गु बानी याय्, मातृभाषाया सम्मान तय् ।