मेयर्स कपया उपाधि नेपाल पुलिस क्लबयात, एपीएफ क्लब ८गू विकेटं बुत
चिल्लाथ्व पारु, ११४१ चैत १, आइतबाः
नेपाल पुलिस क्लबं काठमाडौं मेयर्स कपया उपाधि त्याकुगु दु । म्हिगः जूगु फाइनल कासाय् मेगु विभागीय टीम सशस्त्र प्रहरीया एपीएफ क्लबयात ८गू विकेटं बुका पुलिसं उपाधि त्याकुगु खः ।
एपीएफं बिउगु सच्छि व ५गू रनया आज्जु पुलिसं २४गू ओभर १गः बलय् २गू विकेट त्वफिका पूवंकल । पुलिसया नितिं सुनिल धमलां ५९गू रनया अर्धशतकीय पारी म्हितल ।
अनिल साह व कुशल भुर्तेलं उतिग्यंक १५गू रन दयेकुबलय् दीपेन्द्रसिंह ऐरीं ११गू रन दयेका अविजित जुल । बलिङपाखे एपीएफया अविनाश बोहरा व भुवन कार्कीं १गू÷१गू विकेट काल ।
थ्वयान्ह्यः कीर्तिपुरस्थित टीयु अन्तर्राष्ट्रिय क्रिकेट मैदानय् टस त्याका न्हापा ब्याटिङ याःगु एपीएफं २९गू ओभर ४गः बलय् अलआउट जुसें सच्छि व ५ गू रन दयेकल ।
एपीएफया नितिं बसन्त रेग्मीं २२गू, सन्दीप जोरा व अमर रौटेलां उतिग्यंक १८गू÷१८गू रन दयेकल । अथेहे भुवन कार्कीं १४गू रन दयेकुबलय् अविनाश बोहरां १२गू रन दयेकल । मेपिं कासामिं निदुगं ल्याःया रन मुनेमफुत ।
बलिङपाखे पुलिसया गुल्सन झा व सागर ढकालं ४गू÷४ गू विकेट काःबलय् पवन सर्राफ व ललित राजवंशीं १गू÷१गू विकेट काल । धेंधेंबल्लाया त्याकामि पुलिसं ५ गू लख तका व ल्युत्याकामि एपीएफं ३ गू लख तका चूलाकल । धेंधेंबल्लाय् ५गू टिमया ब्वति दुथ्यागु खः ।
Categorized in कासा
