२०७९ श्रावण २५, बुधबार

मिस नेवाः नेपाल ११४१ या उपाधि कृषा महर्जनयात

राम डंगोल | सिल्लागा द्धितीया ११४१, फागुन १७ सोमवाः

१५क्वःगु मिस नेवाः नेपाल ११४१, कृषा महर्जन जुयादीगु दु ।
 
१४म्ह प्रतिस्पर्धीपिन्त ल्यूने लाका येँया डल्लु च्वनिम्ह नेवाः सुन्दरीं कृषा महर्जनं थुगुसीया ताज त्याकेत ताःलागु खः ।
 
नेप्लिज फेसन होमया ग्वसालय् नेपाल प्रज्ञा प्रतिष्ठानय् जूगु ग्रान्ड फिनालिइ वय्कलं १५ क्वःगु मिस नेवाः नेपाल ११४१ या ताज त्याकूगु खः । कृषां ताजलिसें छगू लखः ध्येबाया सिरफा न त्याकूगु दु । 
 
मू निणर्ायक नेपाल टेलिकमया चिफ कमर्सियल अफिसर भानुराज श्रेष्ठं न्यंगु ‘मनको घाउ र बाहिरी घाउमा कुन बढी दुख्छ’ धाःगु न्ह्यसःले ‘जिउको तुलनामा मनको घाउ पीडादायी हुने, मनमा लागेको घाउ डाक्टरले पनि पत्ता लगाउन नसक्ने र ठीक पार्न पनि नसक्ने तथा माटोको घाउजस्तै हुने’ धकाः लिसः बिया ताज पुइत ताः लाःगु खः । वय्कलं बेस्ट नेपाल भाषाया उपाधि नं त्याकल ।  
 
धेँधेँबल्लाखय् यलःया प्रिया तण्डुकार मिस नेवाः नेपाल फस्ट रनरअप व कलंकी येँया कृष्टिना महर्जन मिस नेवाः नेपाल सेकेन्ड रनरअप जुयादिल । उमिसं उपाधिबापत छसिकथं २५द्वः व १५द्वः ध्येबा त्याकल ।
 
प्रियां मिस पब्लिक च्वाइस व कृष्टिनां मिस चार्मिङया उपाधि त्याकेत ताःलात । रोजिन शाक्यया कोरियोग्राफी व पुँलाम्ह मिस नेवाः नेपाल सुनिता डंगोलं न्ह्याकादीगु धेँधेँबल्ला नेपाल क्योकुसिन सेइसिन काइकान कराँते संघया नायः अशोककुमार श्रेष्ठ, नेपाल टेलिकमया मेनेजर सरोजकुमार शाक्य, स्पेसल ओलम्पिक नेपालया नायः डा. शिक्षिता श्रेष्ठ, कन्र्सन नेपालया निर्देशक डा. विजय सैंजु, पुँलाम्ह मिस नेवाः नेपाल एलिशा वज्राचार्य व नेपाल लिपी गुठीया न्वकू अनिल स्थापित निणर्ायक जुयादीगु खः ।
 
नेवाः कला व तजिलजि न्ह्यब्वइगु झाँकीलिसें क्वचाःगु धेँधेँबल्लाखय् मनिका खड्गी मिस ट्यालेन्ट व मिस फोटोजेनिक, रोहिना महर्जन सोसिएल वेलफेयर एम्बेसडर चिफ व बेस्ट स्किन, मनीषा महर्जन बेस्ट ड्रेस, एन्जिला अवाले मिस डिसिप्लेन, लेनिका डंगोल बेस्ट हेयर व मिस पर्सनालिटी, सौर्य शाही बेस्ट स्माइल लिसें स्वीकृति महर्जन मिस फ्रेन्डसिप ल्यःगु खः ।
Categorized in मनोरन्जन