नेकपा माओवादी केन्द्रया केन्द्रीय समितिया मुँज्या च्वनीगु, न्हूगु सरकार व न्हूगु रणनीतिया बारे सहलह जुइगु
लहनान्यूज | चिल्लाथ्व पारु, ११४१ चैत १, आइतबाः
नेकपा माओवादी केन्द्रया केन्द्रीय समितिया मुँज्या थौं च्वनेत्यंगु दु । सर्वोच्च अदालतं नेकपाया एकीकरण बदर यानाः साबिकया हे दलया हैसियतय् थ्यंकेधुंकाः माओवादी केन्द्रं केन्द्रीय समितिया मुँज्या सःतूगु खः ।
मुँज्याय् पार्टीया नां, न्हूगु रणनीति, न्हूगु सरकार गठनया लागिं मेगु दलत लिसेया समिकरण व प्रधानमन्त्री केपी शर्मा ओलीयात बियातःगु समर्थन लिसेंया विषयस सहलह जुइगु धाःगु दु ।
अथे हे, माओवादी केन्द्रपाखें सरकारय् दुथ्याःपिं मन्त्री व एमालेया केन्द्रीय दुजलय् मनोनित जूपिं २३ नेतातय्त कारवाही यायेगु लिसेंया विषयस नं सहलह जुइगु नेतातय्सं धाःगु दु ।
मुँज्याय् पार्टीया न्हूगु रणनीति, न्हूगु कार्यविभाजन व महाधिवेशनया तयारीया विषयस नं सहलह जुइगु धाःगु दु ।
Categorized in राजनीति
