नेकपा माओवादी केन्द्रया केन्द्रीय कमिटीया मुँज्या थौं नं च्वनिगु
चौलाथ्व द्धितीया ११४१, चैत्र २ गते सोमबाः
नेकपा माओवादी केन्द्रया केन्द्रीय कमिटीया मुँज्या थौं नं च्वनेत्यंगु दु । म्हिगःया मुँज्याय् प्रदेशया नेतातय्सं थःगु प्रदेशया अवस्थाबारे रिपोर्टिङ याःगु खः ।
मुँज्याय् प्रदेश १ पाखें सावित्री भुषाल, २ पाखें विश्वनाथ साह, बागमतीपाखें नारायण दाहाल, गण्डकीपाखें हितराज पाण्डे, लुम्बिनीपाखें ओनसरी घर्ती, कर्णालीपाखें माया शर्मा व सुदूरपश्चिमपाखें नेपबहादुर चौधरीं रिपोर्टिङ याःगु खः ।
अथे हे, नायः प्रचण्डं पार्टीया नां हिलेत याःगु प्रस्तावयात आपाःथे केन्द्रीय दुजःतय्सं विरोध याःगु दु । उमिसं हथासं पार्टीया नां हिले मज्यूगु छ्याता ब्यूगु नेतातय्सं धाःगु दु ।
थौंया मुँज्याय् एमालेय् वंपिं नेतातय्त कारबाही, सत्ता समीकरण, सरकारयात बियातःगु समर्थन व पार्टीया न्हूगु रणनीतिबारे सहलह जुइगु धाःगु दु । माओवादीया शनिबाः च्वंगु स्थायी समिति मुँज्यां थौं केन्द्रीय समिति मुँज्या सःतेगु निर्णय याःगु खः ।
स्थायी समिति मुँज्यां सरकारय् दुपिं ७ मन्त्रीयात लित सःतेगु व एमालेय् वंपिं २३ नेतातय्त स्पष्टीकरण कायेगु निर्णय याःगु खः ।
