अन्तर्राष्ट्रिय मातृभाषा दिवस नेपालय् नं थीथी ज्याझ्वः याना हन, मातृभाषा पत्रकारिता व्यावसायिक कथं न्ह्यावनेमाःगुलिइ जोड
राम डंगोल | सिल्लाथ्व दशमी ११४१, फागुन १० सोमबाः
म्हिगः फेब्रुअरी २१, हलिंन्यंक थीथी ज्याझ्वः यानाः अन्तर्राष्ट्रिय मातृभाषा दिवस हन ।
थ्व हे झ्वलय् नेपालय् नं थीथी ज्याझ्वः जुल । अन्तर्राष्ट्रिय मातृभाषा दिवसया हे लसताय् नेवाः पत्रकार राष्ट्रिय दबूलिं येँ छगू अन्तरक्रिया ज्याझ्वः यात । ज्याझ्वःलय् उपस्थित मातृभाषि पत्रकार, संचारकःमिपिन्सं मातृभाषा माध्यमं जुयाच्वंगु पत्रकारितायात राज्यं मेगू भाय्या पत्रकारिता थें मान्यता बियामच्वंगु व बिइमाःगु खँय् जोड बिल । उगु लसताय् संचारकःमिपिनिगु समस्या व चुनौतीया विषयस् नं सहलह जूगु खः ।
ज्याझ्वःलय् नेपालभाषाया दैनिक पत्रिका नेपालभाषा टाइम्सया सम्पादक वरिष्ठ पत्रकार सुरेशकिरण मानन्धरं नेपालभाषा पत्रकारिता क्षेत्रय् व्यावसायिक कथं थपू यायेमाःगुलिइ जोड बियादिल । वय्कलं ‘आ भावनाया भरय् जक नेपालभाषा पत्रकारिता न्ह्याःनाच्वंगु तर भावनां ताः ईतक्क न्ह्याय् फइमखु । थुकि आर्थिक पक्षयात नं कःघाना न्ह्यावने माः ।’ वरिष्ठ पत्रकार मानन्धरं धयादिल ।
अथेहे पत्रकार दबूया केन्द्रीय नायः सुरजबीर बज्राचार्यं नेपालभाषाया पत्रकारिता क्षेत्रय् विकासया लागि दबू क्रियाशील जूया हे च्वनेगु प्रतिवद्धता प्वंकादिल । करीब स्वदँ न्ह्यः पत्रकार दबूलीं २६गू भाषाभाषीया उपस्थितिइ मातृभाषा पत्रकारिता मूँज्या यानागु लुमंकुसें नायः बज्राचार्यं सहकार्य व सहलहपाखें हे थ्वः लागाया समस्या थुइका समाधानय् वनेमाःगुलिइ जोड बियादिल । दबूया न्वकू नृपेन्द्रलाल श्रेष्ठं न्हापांगु मातृभाषा पत्रकार धर्मादित्य धर्माचार्ययात लुमंकुसें नेपाःया पत्रकारिता क्षेत्रया थपुतिइ नेवाः पत्रकारपिनिगु विशिष्ट योगदान दूगु वरिष्ठ न्वकू श्रेष्ठं दावी यानादिल ।
अथेहे नेवाः टिभि एचडिया नायः नवीन जोशीं स्वकूमिपिनिगु ल्याः व बजाःया मगामचाःया दथुई मातृभाषाया टेलिभिजन च्यानल न्ह्याकेत यक्वः हे थाकूगु धयादिल । मातृभाषा माध्यमं न्ह्यानाच्वंगु संचारमाध्यमयात राज्यं मूलधारया संचारमाध्यमलिसे तया स्वय् मज्यूगु धयादिल ।
एफएम रेडियो नेपालभाषाया न्हापांम्ह समाचारवाचक बिराजकाजी राजोपाध्यायं मातृभाषा पत्रकारिता क्षेत्र विगतया तुलनाय् व्यावसायिक जूयावंगु दावी यानादिल । ‘विगतय् थ्व क्षेत्रय् गुगुनकथंया आर्थिक उपार्जनया बारे विचाः याये थाकू तर थौंकन्ह्य् थ्वः क्षेत्रय् ज्या याना थः परिवार नं म्वाकेफइगु अवस्था दु ।’ राष्ट्रिय प्रसारणया न्हापाम्ह मिसा टेलिभिजन ज्याझ्वः प्रस्तोता मीना बज्राचार्यं थःगु अनुभव न्यंकादिसें वंगु दिंलय् थें आः नं मिसा संचारकःमिपिं याउँक न्ह्यावनेत पंगः दया हे च्वंगु धयादिल ।
लहना साप्ताहिकया व्यवस्थापक लिसे पत्रकार दबूका केन्द्रीय दाँभरी सुरेन्द्र भक्त श्रेष्ठं नेपालभाषाया संचार गृह छप्पं जुया बिग मिडिया हाउसया परिकल्पनाय् वनेमाःगु सुझाव वियादिल । ‘नेपालभाषां पत्रकारिता न्ह्याःगु सच्छि दँ दयेधुंकल, सच्छि दँया इतिहास दयेके धुंकुपिन्स आः बिग मिडिया हाउसया कथं नेवाः पत्रकारितायात छाय् मन्ह्याकेगु ?’ श्रेष्ठ धयादिल ।
नेपालभाषाया न्हापांगु समाचार पोर्टल नेपालमण्डल डट कमया दुजः अस्मित मल्लं नेपालभाषा माध्यमं न्ह्यानाच्वंगु अनलाइन माध्यमपिन्सं आत्मसमीक्षा यायेमाःगु धयादिल । सरकारपाखे ब्यूगु सुविधा कायेत नेवाः त न्ह्याबले ल्यूनेलाइगु व माःगु मापदण्ड पूवंका नेपाल सरकारं ब्यूगु सुविधा त कायेत न्ह्याबलें न्ह्यने वनेमाःगुलिइ मल्लं जोड बियादिल ।
ज्याझ्वःलय् दबूया निवर्तमान नायः श्रीकृष्ण महर्जन, नेपालभाषाया न्हापांम्ह सिने पत्रकार लिसें दबूया सल्लाहकार विजयरत्न तुलाधर, वरिष्ठ पत्रकार लिसें दबूया सल्लाहकार रमेशकाजी स्थापित, थीथी संचारमाध्यमय् आवद्ध नेवाः पत्रकार व पत्रकार दबूया केन्द्रीय लिसें जिल्ला दुजःपिनिगु ब्वःति दूगु खः ।
