थौं मांया ख्वाः स्वयेगु दिं, थुगुसी नं निषेधाज्ञा लिच्वःलय् पर्व
चौलागा आमै ११४१,बैसाख २८ बुधवाः
थौं वैशाख कृष्ण औंसी अर्थात् मांया ख्वाः स्वयेगु दिं । थौंया दिनय् हनीगु थुगु पर्वय् जन्म ब्यूम्ह मांयात साःसाःगु नसा ज्वलं अले बांलाःगु वसः लिसेंया देछा बीगु परम्परा दु ।
मां मदुपिनि धाःसा मांयात तर्पण व पिण्डदान लिसें श्राद्ध अले पुरोहितयात सिदादानलिसें भोजन याकाः मदुम्ह मां व मामं याःगु महान् गुण लुमंकेगु याइ । थौंया दिनय् मदुम्ह मांया लुमन्तिइ थानकोट लिक्कया मातातीर्थय् मेला जुइगु याः ।
तर थगुने थें थुगुसी नं कोरोना महामारीाय हुनिं मातातीर्थ मेला स्थगित याःगु दु । कोरोना महामारी नियन्त्रणया लागिं जारी निषेधाज्ञाया हुनिं काय्म्ह्याय् मां दुगु थासय् थ्यंकेमफुसां वचनं हे नं लय्ताय्के फइ ।
छेँय् छेँय् हे च्वनाः दुम्ह मांयात लय्तायेकेगु मदुम्ह मांया नामय् श्रद्धा प्वंकेफइगु शास्त्रीय मान्यता दु ।
Categorized in राष्ट्रिय
