समाजसेवी मोतिलाल शिल्पकारं न्ह्याकावःगु मोति सहयोगी संस्थापाखें लय्पतिकं बियावःगु आर्थिक ग्वाहालि थुगु लाय् नं लःल्हाःगु दु ।

संस्थापाखें ७५ दँ वा व स्वयां च्वय्या ज्याथः नागरिकपिन्त वासः न्याय्त बियावःगु आर्थिक ग्वाहालि वंगु आइतबाः न्याक्वःगु खुसी लःल्हाःगु खः । संस्थां हरेक महिनाया १ गतेया दिनय् न्हिं सच्छिया ल्याखं लच्छिया स्वद्वः तकाया आर्थिक ग्वाहालि ज्याथः नागरिकपिन्त बियावःगु खः ।

सुं नं वासः नयाच्वनेमाःपिं ज्याथःपिनि आर्थिक समस्याया ल्याखं वासः त्वःमफीमा धइगु ल्याखं थम्हं आर्थिक ग्वाहालि बियावयागु संस्थाया नायः मोतिलाल शिल्पकारं धयादिल ।

आः ४६ म्ह ज्याथः नागरिकपिन्त ग्वाहालि बियावयागु व ५० म्हेसित ग्वाहालि याय्गु लक्ष्य दुगु नं शिल्पकारं कनादिल । शिल्पकारं वंगु मंसीरनिसें थुगु ग्वाहालि बीगु न्ह्याकूगु खः ।

Categorized in राष्ट्रिय