म्यानमारय् न्ह्यानाच्वंगु हिंसाय् लाना ४३ म्ह मस्त सित
चिल्लागा पञ्चमी ११४१, चैत्र २० गते शुक्रबाः
म्यानमारय् न्ह्यानाच्वंगु हिंसाय् लाना ४३ म्ह मस्त सीगु दु । वंगु फेब्रुअरीइ सेनां सत्ता ल्हातय् कायेधुंका जुयाच्वंगु ब्वज्याया झ्वलय् उपिं मस्त सीगु सेभ द चिल्डे«नयात उध्रित यासें बीबीसीं न्ह्यथंगु दु ।
सुरक्षाकर्मीं तच्वकं बल छ्यबलय् सेनाया विरोधय् जुयाच्वंगु ब्वज्याय् दुथ्यापिं आन्दोलनकारी मध्ये आपालंसिया ज्यान वनेधुंकुगु दु । सुरक्षाकर्मीया दमनया हुनिं घाःपाः जूपिनि ल्याः नं अप्वयाच्वंगु अन्तर्राष्ट्रिय सञ्चारमाध्यमतयेसं दाबी याःगु दु ।
थुखे म्यान्मारस्थित संयुक्त राष्ट्रसंघया आवासीय प्रतिनिधिं अनया सुरक्षा अवस्था चिन्ताजनक दूगु व नियन्त्रण पिने वने फइगु खतरा क्यनादीगु दु । सुरक्षा फौजं योजनाबद्ध कथं घातक बल छ्यगु प्रमाणपाखें खनेदूगु द्वपं बिउगु दु ।
म्यान्मारय् सैन्य कू थुखे सीपिं ५सः सिवें अप्वः मनूमध्ये ९०गू प्रतिशत गोलीं कयेकेज्या पाखें सीगु राष्ट्रसंघया धापू दु । उपिं मध्ये आपालंसिया छँय्ने गोली कयेकुगु व निशानेबाजत न्हिने हे परिचालन जूगु धाःगु दु । शान्तिपूर्ण ब्वज्या विरुद्ध जूगु हिंसाया राष्ट्रसंघीय सुरक्षा परिषद्ं तच्कवं निन्दा याःगु दु ।
थ्वहे दथुइ सैनिक सरकारं म्यानमारया नेतृ आङ साङ सूची व वयेकया ४म्ह ग्वहालिमियात थी थी मुद्दा तःगु दु । उगु मुद्दाय् १४ दँ तक्कया जेल सजाय जुइगु म्यानमारया अधिकारीतय्सं न्ह्यथंगु दु । सूचीयात थगुनेया निर्वाचनय् धाँधली याःगु व गैरकानुनी कथं सञ्चार सेट तःगु लिसेंया द्वपं बिउगु दु ।
न्ह्यानाच्वंगु हिंसा म्हो मजूगु धासें म्यानमारया सैनिक नेतृत्वया छचखोर कुँख्यना जुयाच्वंगु दु । म्यानमारया नितिं संयुक्त राष्ट्रसंघया राजदूतं प्रजातन्त्रया पक्षय् जूगु आन्दोलनय् जूगु दमन निन्दनीय जूगु प्रतिक्रिया बियादीगु दु ।
