२०७८ बैशाख २४, शुक्रबार

म्यानमारय् न्ह्यानाच्वंगु सैन्य दमनया पश्चिमा देय्पाखें विरोध

सिल्लाथ्व चतुर्थी ११४१, फागुन ३ सोमवाः

म्यानमारय् सेनाया पलाः विरुद्ध लिपांगु दिंलय् मदिक्क ब्वज्या जुयाच्वंगु दु । सैनिक सरकारं जारी याःगु निषेधाज्ञाया अवज्ञा यासें द्वलंद्वःम्ह वर्मेली नागरिकं न्हिं न्हिं विरोध ब्वज्यायात न्ह्याकातःगु दु ।
वंगु नोभेम्बरय् क्वचागु आम निर्वाचनय् धाँधली जूगु धका फ्रेब्रुअरी १य् म्यानमारय् सेनां देय्या शासन थःगु ल्हातय् काःगु दु ।निर्वाचनय् आङ साङ सूचीया नेसनल लीग फर डेमोक्रेसी (एनएलडीं) तःधंगु बहुमत नापं जीत हासिल याःगु खः । सैन्य कू नापं नेतृ सुची लिसें एनएलडीया थी थी नेता नं सेनाय् नियन्त्रणय् लाःगु दु ।
मदिक्क ९न्हूनिसें न्ह्यानाच्वंगु विरोध ब्वज्यात क्वत्त्येलत सेनां तःधंगु ल्याःखय् थःगु शक्ति परिचालन याःगु बीबीसीं न्ह्यथंगु दु । चान्हय्सिया इलय् निषेधाज्ञा व कफर््यू जारी याःसा नं उकियात हाचांगासें सर्वसाधारण सेनाया पलाःया विरोधय् सतकय् कुहाँवःगु खः । विरोधया ज्यापहः नियन्त्रणय् काःगु सेनां चान्हय्सिया इलय् इन्टरनेट तकं बन्द याःगु दु । म्यानमारया उत्तरी राज्य काचिनय् सुरक्षाकर्मीया गोलीं लाना छम्ह ब्वज्यामि घाःपाः जूगु दु ।
सेनाया पलाःया विरोध यासें थी थी देशं नेतातयेत त्वःतेत सैनिक सरकारलिसे इनाप याःगु दु । म्यानमारस्थित संयुक्त राष्ट्रसंघया विशेष प्रतिनिधि टम एन्ड्रयुजं सेनाया ज्यापहःलं आम नागरिकय् निराशा ब्वलनाच्वंगु धयादील ।
वयेकलं सेनां नागरिकयात युद्धया घोषणा याःगुलिं लिच्वः सकरात्मक मवइगु ख्याच्वः तकं बियादीगु दु । अथेहे युरोपियन युनियन, बेलायत, क्यानडा लिसेया थी थी दूतावासतयेसं विज्ञप्ती जारी याना सुरक्षा फौजयात नागरिकयात धरपकड मयायेत ख्याच्वः बिउगु दु ।
उमिसं निर्वाचित सरकारया पतन पनेत जूगु ब्वज्याय् हिंसा मयायेत इनाप तकं याःगु दु । म्यानमारया जनतायात प्रजातन्त्र, स्वतन्त्रता, शान्ति व समृद्धिया नितिं समर्थन यायेगु उपिं देशं मंका कथं जारी याःगु विज्ञप्तीइ उल्लेख यानातःगु दु ।
उखे चान्हय्सिया इलय् नं ब्वज्या न्ह्यानाच्वंगुलिं सुरक्षाकर्मीं थी थी शहरय् सर्वसाधारणया छेँय् छापा तःगु धाःगु दु । अथेहे सेनां थःगु कारवाहीयात क्वात्तुकेत २४ घौ सिवे अप्वः ई मनूयात हिरासतय् तयेत व निजी सम्पति माला अदालतया आदेश मालिगु लिसेंया कानुनत निरलम्बन याःगु दु ।
Categorized in अन्तर्राष्ट्रिय