२०७८ बैशाख १, बुधबार

म्यानमारय् सुरक्षाकर्मीया दमनया हुनिं म्होतिइ १८म्ह सीत, द्वःछि सिवें अप्वः प्रहरीया नियन्त्रणय्, अन्तर्राष्ट्रिय समुहपाखें निन्दा

सिल्लागा द्वितीया ११४१, फागुन १७ सोमबाः

म्यानमारय् जूगु प्रहरी दमनया विश्व समुदायं कुँख्यंगु दु । संयुक्त राष्ट्रसंघीय मानवअधिकार आयोगं स्वतन्त्र कथं विरोधय् कुहाँवःपिं नागरिकयात जूगु प्रहरी दमनया कुँख्यंगु दु । 
 
सैनिक कुविरुद्ध ब्वज्या याःपिं थ्यंमथ्यं द्वःछि सिवें आपा सर्वसाधारणयात नियन्त्रणय् काःगु धका राष्ट्रसंघ लिसेंया थी थी अन्तर्राष्ट्रिय निकायं कुँख्यंगु बीबीसीं न्ह्यथंगु दु ।
 
सेनाया पलाः व विरोध ब्वज्याय् जुयाच्वंगु दमनयात  अमेरिका व युरोपेली युनियन लिसेंया देय्तय्सं कुँख्यंगु खः  ।
 
सैनिक शासनया विरोधय् कुहाँवःपिं ब्वज्यामियात प्रहरीं गोलीं कय्कुबलय् म्होतिइ १८म्ह ब्वज्यामि सीगु दु । यङ्गुन, दाबेई व मण्डले शहरय् दक्वःलय् आपा ब्वज्यामि हताहत जूगु न्ह्यथंगु दु ।
 
सैनिक शासन विरुद्ध नागरिक अवज्ञाया झ्व अप्वयावंबलय् सुरक्षाकर्मीपिन्सं सतक ब्वज्या विरुद्ध बल छ्यलेगु अप्वयायंकुगु नं अन्तर्राष्ट्रिय सञ्चार माध्यमतयेसं न्ह्यथंगु दु् ।
 
इन्टरनेट तकं अवरुद्ध याःगु सैनिक सरकारं सामाजिक संजालय् नं प्रतिबन्ध तःगु दु ।
 
वंगु फ्रेब्रुअरी १ य् सैन्य कु जुइधुंका तःंधंगु ल्याःखय् शान्तिपूर्ण विरोध ब्वज्याया ताः ई लिपा सुरक्षा बलं शनिबाःनिसें हिंसात्मक कारवाही न्ह्याकुगु खः ।
 
निर्वाचनय् धाँधली जूगु धका म्यानमारया सेनां नेतृ आङ साङ सुची नापंया शीर्ष नेतातयेत हिरासतय् कया सैन्य शासन लागू याःगु दु ।
 
म्यानमारय् दच्छिया नितिं संकटकालया घोषणा याःगु दु । नेतृ सुची नापंया नेतातये रिहाइया माग यासें जूगु ब्वज्याय् सुरक्षाकर्मीं दमन न्ह्याकुगु खः  ।
Categorized in अन्तर्राष्ट्रिय