अलेक्सी नाभाल्नी स्वास्थ्यया खँय् विश्व समुदायया चिउता
लहानान्युज | चौलाथ्व सप्तमी ११४१,बैसाख ६ सोमवाः
अमेरिकां रसियाया विपक्षी नेता अलेक्सी नाभाल्नी जेलय् हे सीसा उकिया गंभीर लिच्वः फयेमालिगु ख्याच्वः बिउगु दु ।
चिकित्सकं वासः यायेगुलिइ ध्यान मबिउसा नाभाल्नी छुं दिं दुने हे सिइफइगु खतरा न्ह्यथनेधुंका अमेरिकां थुकथं ख्याच्वः बिउगु खः । अमेरिकाया राष्ट्रिय सुरक्षा सल्लाहाकार जेक सुलिभानं नाभाल्नीया वासः यायेगुलिइ रसियायात विश्व समुदायं जवाफदेही दयेकिगु धयादील ।
थ्वयान्ह्यः अमेरिकी राष्ट्रपति जो बाइडनं नाभाल्नीया वासः जुयाच्वंगु पूवंक मखू कथं व अनुचित जूगु धयादीगु खः । बेलायत, फ्रान्स, जर्मनी र यूरोपियन यूनियनं नं नाभाल्नीया वासः यायेगुलिइ चिउता प्वंकुगु दु ।
तर बेलायतया नितिं रसियाया राजदूतं धाःसा नाभाल्नीं थःपाखे ध्यान सालेत स्वःगु धका वयेकयात जेलय् हे सिइके मबिइगु धाःगु दु । न्हापाया जेल सजायया इलय् तःगु शर्तत हाचांगाःगु धका मस्कोया छगू अदालतं राष्ट्रपति भ्लादिमिर पुटिनया कट्टर आलोचक नाभाल्नीयात फेब्रुअरीइ ३दँ त्याया जेल सजाय न्यंकुगु खः ।
नाभाल्नी पायेछि वासः यायेगुया माग याना वंगु १९ न्हू निसें भोक हड्तालय् दी । नाभाल्नीया हि परिक्षणं वयेकयाके नुगः स्येँ व जलाःस्येँया समस्यां छुं नं ईलय् खनेदयेफइगु वयेकया निजी चिकित्सकं धाःगु दु । रसियाया कारागार प्रशासनं धाःसा नाभाल्नी सरकारी चिकित्सकया उपचार अस्वीकार याःगु न्ह्यथंगु दु ।
वंगु अगस्टय् घातक विष हताःलय् लाम्ह ४४ दँया नभाल्नी जर्मनीइ वासः याना स्वदेश लिहाँवयाच्वंबलय् विमानस्थलं प्रहरीं ज्वंगु खः । नाभाल्नी ज्वनेधुंका रसियाया थी थी शहरय् तच्वकं विरोध ब्वज्या जूगु खः । राष्ट्रपति पुटिनया निर्देशनय् थःपिन्त विष नकूगु नाभाल्नीया द्वपंयात क्रेमलिं धाःसा अस्वीकार याःगु दु ।
Categorized in अन्तर्राष्ट्रिय
