लिपागु राजनीतिक अवस्थाबारे सहलह यायगु निति नेपाली कांग्रेसया पदाधिकारीपिनिगु बैठक थौं च्वनेत्यःगु दु ।

उगु बैठक देउवा निवास बुढानीलकण्ठय् न्हिनय् स्वता इलय् च्वनेत्यःगु खः। बैठकय् पार्टीया पूर्वपदाधिकारीपि तक सहभागी जुइ धका कांग्रेस मुख्य सचिव कृष्णप्रसाद पौडेल जानकारी बिःगु दु। थौंया बैठकय् विकसित राजनीतिक ह्यूपाः, संसद् पुनःस्थापनालिपा कांग्रेसया रणनीति, नेकपा प्रचण्ड–माधव समूहया प्रस्ताव लगायत विषयय् सहलह जुइ धका धाःगु दु ।

संसद विघटन याम्ह प्रधानमन्त्री केपी शर्मा ओलीया पलाःयात सर्वोच्च अदालतं असंवैधानिक ठहर यासे पुनःस्थापित संसदय् न्हुम्ह सरकार गठनय् धेंधें बल्ला सुरु जुइ धुकुगु दु । थुकिइ कांग्रेस निर्णायक खनेदुगु दु । प्रचण्ड–माधव समूहया अध्यक्षपि पुष्पकमल दाहाल ‘प्रचण्ड’ व माधव नेपालं बुधवाः देउवायात नाप लाना सत्ता साझेदारीया प्रस्ताव तक तये धुकुगु दु ।

देउवां पार्टीइ सहलह याना लिसः बिइ धका धाःगु खः । अथेहे कांग्रेस संसदीय दलया नेता तक जुयादीम्ह देउवां थौं पदाधिकारी व पूर्वपदाधिकारीपि नाप सहलह यायेत्यःगु खः।

प्रतिनिधिसभाय् कांग्रेसया ६१ म्ह सांसदपि दु ।

Categorized in राजनीति