नेपाल व रावलयात एमालें कारबाही यात
चिल्लागा द्धितीया ११४१, चैत्र १७ मंगलवाः
नेकपा एमालें वरिष्ठ नेता माधवकुमार नेपाल व न्वकू भीम रावलयात कारबाही याःगु दु ।
पार्टीया हित अःखः ज्यापहः याःगु धासें इपिं नेतातय्त झिक्वःगु महाधिवेशन आयोजक कमिटीया दुजः, पार्टीया फुक्क कथंया जिम्मेवारी अले पार्टीया दुजः तकं मजुइगु यानाः ६लाया नितिं निलम्बन याःगु दु ।
पार्टीया नायः केपी शर्मा ओलीं ल्हाःचिं तयातःगु पतिइ पार्टी एकतायात विखण्डन यायेगु, पार्टी तछ्यायेगु, पार्टीदुनेया सहकार्य व सद्भावयात क्षतविक्षत यायेगु ज्याय् मदिक्क न्ह्यज्यानाः अवैधानिक गुट दयेकूगु उल्लेख याःगु दु ।
गल्ती स्वीकार मयाःसें अहंकार ब्वयाः आत्मकेन्द्रित स्पष्टिकरण ब्यूगु पतिइ उल्लेख यानातःगु दु । नेतातय्त गलत लँपुइ मवनेत लिपांगु ह्वःताः बियागु धासें अन्यागु मयासा झं कडा कारबाही जुइगु ख्याच्वः न ब्यूगु दु ।
उखय्, स्पष्टिकरणया लिसः मब्यूपिं नेता घनश्याम भुसाल व सुरेन्द्र पाण्डेयात हाकन स्पष्टिकरण न्यंगु दु । एमालेया मूछ्यान्जे ईश्वर पोखरेलं प्यम्हं नेतातय्त छन्हुं हे स्पष्टिकरण पौ छ्वःगु खःसां भुसाल व पाण्डें आःतक लिसः मब्यूनि ।
थुखय्, नेकपा एमालेया वरिष्ठ नेता माधवकुमार नेपालं नायः ओलीया निर्णय तानाशाही व चरम असहिष्णु जूगु टिप्पणी यानादीगु दु । वय्कलं ओलीया तानाशाहविरुद्ध ल्वायेत थः कार्यकर्तापिन्त आह्वान तकं यानादिल ।
नेता नेपालं सामाजिक सञ्जालमार्फत थः गब्लें न मैदान त्वःत मवनेगु उद्घोष न यानादिल । क्वचाक्वचा जूगु कम्युनिष्ट आन्दोलनयात थःपिन्सं एकीकृत, बिस्तार व विकास यानाच्वंगु अवस्थाय् ओलीं उकियात प्रभावित याःगु नेता नेपालं द्वपं बियादिल ।
अथेखःसां आःतकया उपलब्धियात थःपिन्सं रक्षा यायेगु धयादिल ।
