येँ महानगरपालिका मातहतया स्कूलय् स्थानीय पाठ्यक्रम अन्तर्गत नेपालभाषा ब्वंकीपिं सच्छि व ७२ शिक्षकया माग जुयाः आः प्रशिक्षक प्रशिक्षण न्ह्याःगु अवस्थातक्क थ्यन । थुकिं येँ महानगरपालिका दुने नेपालभाषा विषयया पठनपाठनया सुनिश्चितता क्यंगु दु । नेपालभाषा विषय ब्वंकेगु नितिं आःतक्क ६ सः स्वयां आपाःसिनं निवेदन दर्ता याय्धुंकूगु दु । सुरुवाती इलय् आवेदकपिनिगु थुगु ल्याः उत्साहजनक कथं काय्माः ।

नेपालभाषा शिक्षकया नितिं आवेदन बीत सम्वन्धित संस्थाया सिफारीस माःगु धयातःगु खः । उगु सिफारीस नेवाः स्यनामि दबू नेपालमण्डलपाखें बियावःगु दु । प्रधानाध्यापक जुयाः रिटायर्ड जुइधुंकूपिं स्यनामि अथवा शिक्षकपिनिगु संस्था खः नेवाः स्यनामि दबू । थ्वयां न्ह्यः स्कूल स्कूलय् नेपालभाषा शिक्षा बीकेगु नितिं व नेपालभाषा शिक्षक उत्पादन याय्गु नितिं थुगु संस्थां ज्या यानावःगु दु । थुगु हे दबूपाखें येँ महानगरापालिकाय् नेपालभाषा शिक्षकया नितिं आवेदन बीत माःगु सिफारीस बियावःगु दु । दबूया मू छ्यान्जे वरुण वैद्यया कथं नेपालभाषा ब्वने थाकु, ब्वंके थाकु जक ताय्दयाच्वनीगुलिं आवेदक हे वइला मवइला तक्कया ग्याःचिकु दयाच्वंगु अवस्थाय् शुरुइ हे ६ सय नं मयाक्क आवेदक वःगुयात सकारात्मक रुपं काय्माः ।

‘अझ थ्व सिबें अप्वः वःसा ज्यूगु खः धइथें न्ह्याम्हेसितं जुइ, थुलि जक ला धकाः आसाकुति मिखां स्वय्गुयात नं सकारात्मक हे धाय्फइ । तर आः शुरुया अवस्थाय् थुलि आवदेक वःगु धइगु लिपा ब्वनीपिं अप्वयावंलिसे ब्वंकीपिं नं झन अप्वयावनीगु निश्चित दु’ मू छ्यान्जे श्रेष्ठं धयादिल । नेपालभाषा शिक्षकया नितिं युवा पुस्ताया उत्साह व सहभागीता खनेदय्माःगु खँय् वैद्यं बः बियादिल । लिपा नेपालभाषा म्वाकातइपिं धइपिं हे युवा पुस्ता जूगुलिं आवेदकय् युवातय् सहभागीता नं बांलाक्क खनेदत धाःसा व मातृभाषा शिक्षाया क्षेत्रय् तसकं हे बांलाःगु खँ जुइगु श्रेष्ठया धापू खः ।

आःया अवस्थाय् युवातय् ल्याः म्ह्वः जूसां मुक्कं संख्यायात स्वय्बलय् झीसं सन्तोष याय् थाय् दुगु व लिपा वनाः नेपालभाषा शिक्षकय् युवातय् सहभागीता व सक्रियता दइगु निश्चित खनेदु । येँ महानगरपालिका अन्तर्गतया दक्वं स्कूलय् नेपालभाषा ब्वनीपिं दइबलय् लिपा उपिं विद्यार्थी हे नेपालभाषा शिक्षक कथं उत्पादन जुइगु जूगुलिं लिपा वनाः शिक्षकया अभाव जुइ धकाः शंका याय्माःगु थाय् हे मदु । थौं स्वयां झिंनिदँ न्ह्यः नीस्वंगु दबूपाखें आः १४ शिक्षकं २६ स्कूलय् नेपालभाषा ब्वंकाच्वंगु दु । दबूयाके दुगु तथ्याङ्क कथं थौंया दिनय् नेपालभाषा ब्वनाच्वंपिं विद्यार्थीपिनि ल्याः ३२ सःम्ह दु । नेवाः बस्ती नेवाः स्कूल अभियान अन्तर्गत सच्छिं मयाक्क स्कूलय् नेपालभाषा विषय तय्केत ताःलाय्धुंकल । नेवाः स्यनामि दबू व नेवाः बस्ती नेवाः स्कूल अभियानया ल्याःचाः छथाय् मुंकेहय्बलय् च्वय् न्ह्यथनागु ल्याः अझ अप्वः हे जुइगु निश्चित जुल ।

नेपालभाषा ब्वनीपिं हे मदु अथवा ब्वंकीपिं हे मदु धकाः समाजय् गुगु खँ वयाच्वनी व भ्रम खः, नेपालभाषा ब्वनीपिं वा ब्वंकीपिनिगु ल्याः बांलाः धइगु यथार्थ थनं सीदत । जनस्तरं जूगु कुतलं थुगु लिच्वः पिहांवःगु दु । आः स्थानीय सरकारं थुकी च्यूताः तःबलय् झीगु दथुइ तःधंगु आशा ब्वलंगु दु । येँ महानगरपालिकां स्थानीय विषय अन्तर्गत नेपालभाषा विषयया ब्वंकेज्या न्ह्याकीगु हे जुल । ख्वप नगरपालिकाय् नं थुकिया तयारी तच्वयाच्वंगु दु । यल महानगरपालिकां नं याकनं हे स्थानीय विषयया ज्यायात न्ह्यःने यंकेमाःगु खनेदु ।

आःया शुरुवाती अवस्थाय् स्वनिगःया स्वंगू स्थानीय सरकारपाखें थः मातहतया स्कूलय् स्थानीय विषय अन्तर्गत नेपालभाषा विषयया पठनपाठन न्ह्याकल धाःसा नं थुकिं बांलाःगु लिच्वः लाकीगु व मेमेगु स्थानीय तहयात प्रभावित याइगु निश्चित दु ।