नेपाल पक्षया सांसदतय्सं ओलीयात स्पष्टिकरण बिल
चौलाथ्व एकादशी ११४१,बैसाख १० शुक्रवाः
नेकपा एमालेया नेता माधवकुमार नेपाल पक्षया सांसदतय्सं संसदीय दलया नेता प्रधानमन्त्री केपी शर्मा ओलीयात स्पष्टिकरण ब्यूगु दु ।
स्पष्टीकरणय् गुक्वःगु महाधिवेशनं पारित राजनीतिक प्रतिवेदन, विधान व उकिया लिधंसाय् दयेकूगु नियमावलीया विरूद्ध थःपिन्सं छुं हे ज्या मयानागु न्ह्यथनातःगु दु । उमिसं थःपिन्त ब्यूगु द्वपंत निराधार धासें छुं नं पार्टी चायेकेगु वा एमालेया उद्देश्य, ज्याझ्वः व विधान अःखःया ज्या मजूगु दाबी याःगु दु ।
प्रधानमन्त्री ओलीं मंगलबाः जक संघ व प्रदेशया यानाः नेता नेपाल व खनाल पक्षया ३२ सांसदयात विधान अःखः पार्टी व सरकारविरुद्ध कुहांवःगु व बिस्कं पार्टी गठनय् जूगु द्वपंलिसें स्पष्टिकरण न्यनादीगु खः ।
थुखे, नेकपा एमालेया खनाल–नेपाल पुचलं नायः केपी शर्मा ओलीं थःपिन्त पार्टीइ च्वनेमबीगु अनेक दाउपेच याःगु द्वपं ब्यूगु दु । ७२क्वःगु पार्टी स्थापना दिवसया सन्दर्भय् थौं छगू अपिल जारी यासें उमिसं एमालेय् च्वनेमबीत अनेक दाउपेच याःगु धाःगु खः ।
उखे नेकपा एमालया नायः अले प्रधानमन्त्री केपी शर्मा ओलीं पार्टी बल्लाकेत थम्हं यानाच्वनागु संवादया कुतःयात कमजोरी भाःमपीत नेपाल पक्षयात चेतावनी बियादीगु दु । कम्युनिष्ट पार्टीया ७३क्वःगु स्थापना दिवसया झ्वलय् बल्खुइ ग्वसाः ग्वःगु पार्टीया केन्द्रीय ज्याकू भवन शिलान्यास ज्याझ्वलय् वय्कलं पार्टी दुने जुयाच्वंगु गुटगत ज्याखँयात मान्यता बी मफइगु व नेतातय्त थुइकेत थम्हं यानाच्वनागु कुतःयात कमजोरी भाःमपीत चेतावनी बियादिल ।
प्रधानमन्त्री ओलीं गुगुं इलय् थःगु पक्षयात सडकं चीकीपिन्सं आः मेगु पार्टी चायेकाः जुलं नं थम्हं कारबाही मयाःसे थुइकेगु कुतः यानाच्वनागु धयादिल ।
Categorized in राजनीति
