न्हूगु सत्ता समीकरणया नितिं कांग्रेसं सतल स्वंगु दलया मुँज्या
लहनान्यूज | चिल्लागा त्रयोदशी ११४१, चैत्र २७ गते शुक्रबाः
न्हूगु सरकार गठनया विषयस सहलह यायेत नेपाली कांग्रेसया सभापति शेरबहादुर देउवां थौं स्वंगु दलया मुँज्या सतादीगु दु ।
पार्टी केन्द्रीय कार्यसमितिं न्हूगु सरकार गठनया नितिं पहल यायेगु निर्णय याःगु थ्यंमथ्यं छवाःलिपा देउवां थौं न्हिनसिया ३ता ईलय् स्वंगु दलया मुँज्या थःगु छेँ भुइजसिइ सतादीगु खः ।
कांग्रेस प्रवक्ता विश्वप्रकाश शर्माया कथं मुँज्या सत्ता समीकरण, न्हूगु सरकार निर्माणया विषयलय् केन्द्रित जुइगु धाःगु दु । मुँज्याय् नेपाली कांग्रेस, नेकपा माओवादी केन्द्र व जनता समाजवादी पार्टी जसपाया मू नेतापिनिगु उपस्थिति दइगु शर्मा धयादिल । देउवाया लिपांगु पलाःखं सत्ता समीकरणय् छुं न्हूगु जुइगु छुमा क्यंगु दु ।
छवा न्ह्यः न्हू सत्ता समीकरणया नितिं न्ह्यायेगु कांग्रेस केन्द्रीय समितिं निर्णय यासां कांग्रेस सभापति, शेरबहादुर देउवा सत्ता समीकरणया लागि इच्छा क्येना मदीगु खः । तर आःवया सभापति देउवा हे न्ह्यज्याःगु दु । कांग्रेस केन्द्रीय कमिटिपाखे निर्णय जूसां सत्ता समीकरणबारे सहलह यायेत दक्व विपक्षीपिनिगु संयुक्त मुँज्या जुइत्यंगु थ्व न्हापांखुसी खः । थ्वयांन्ह्यः निगू पक्षीय सहलह जूसां नं उगु सहलह निष्कर्षविहीन जूगु खः ।
वंगु पुस ५ गते प्रधानमन्त्री केपी शर्मा ओलीं प्रतिनिसिभा विघटन यायेधुंका हे कांग्रेसया छगू पुच ओली सरकारयात विस्थापित यायेमाःगु धिना कयाच्वंगु खः । उगु ईलय् कांग्रेसं संसद विघटनयात असंवैधानिक धया सतक ब्वज्या याःसां सभापति देउवा धाःसा मध्यावधि चुनावय् वनेगु बाँलागु धयावयाच्वंगु खः । सत्ता समीकरणया निर्णायक शक्तिया कथं जसपा दयाच्वंगु दु ।
