नेपालय् दुत्यन न्हूगु कथंया कोरोना भाइसर
चिल्लागा सप्तमी ११४१, चैत्र २२ गते आइतबाः
सुदूरपश्चिम प्रदेशया ३म्हसिके न्हूगु कथंया कोरोना संक्रमण पुष्टि जूगु दु ।
राष्ट्रिय जनस्वास्थ्य प्रयोगशालाय् जूगु परीक्षणय् त्रिनगर नाकां दुहाँवःपिं कञ्चनपुर, डडेल्धुरा व डोटीया छम्ह छम्हसिके कोरोनाया न्हूगु भेरिएन्ट पुष्टि जूगु प्रदेशया सामाजिक विकास मन्त्रालयया प्रवक्ता नरेन्द्र कार्कीं जानकारी बियादील ।
नाकां दुहाँवःपिं २०म्हसिया नमूना राष्ट्रिय जनस्वास्थ्य प्रयोगशालाय् परीक्षणया नितिं छ्वगुलिइ उपिं ३म्हसिके न्हूगु भेरिएन्टया कोरोना संक्रमण पुष्टि जूगु वयेकलं धयादील ।
वयेकलं न्हूगु भेरिएन्ट पुष्टि जूसा नं गुगु कथंया खः धका पुष्टि मजूगु नं धयादील । कञ्चनपुरया कृष्णपुर नगरपालिका, डडेल्धुराको परशुराम नगरपालिका व डोटीको जोरायल गाउँपालिकाया उपिं संक्रमित आः होम आइसोलेसनय् दूगु मन्त्रालयं न्ह्यथंगु दु ।
थ्वहेदथुई म्हिगः नेपालय् लिपांगु २४ घौ दुने सच्छि व २८म्ह कोरोना संक्रमित थप जूगु दु । स्वास्थ्य तथा जनसंख्या मन्त्रालयया कथं थ्व नापं नेपालय् कोरोना संक्रमितया मुक्कं ल्याः २ गू लख ७७द्वः ७ सः व ६८म्ह थ्यंगु दु ।
अथेहे थप सच्छि व ६१ म्ह कोरोना संक्रमित संक्रमणमुक्त जूगु् दु । थ्व नापं आःतक्क संक्रमणमुक्त जूपिनि ल्याः २ गू लख ७३द्वः सच्छि व २३म्ह थ्यंगु दु । अथेहे लिपांगु २४ घौ दुने कोरोनां थप छम्ह सीगु दु ।
देय्यंक कोरोनां सीपिनि ल्याः ३ द्वः व ३२म्ह थ्यंगु दु । आः देय्यंक द्वःछि ६सः व १३म्ह सक्रिय संक्रमित दु ।
Categorized in राष्ट्रिय
