न्यूरोडय् हाकु पत्रे सडकय् येँ महानगरं पार्किङ निषेध यानाबिल। येँ महानगरया थ्व निर्णय धुंकाः थुकिया पक्ष व विपक्षय् खुब बहस जुयाच्वंगु दु। थ्व हे बहसं सामाजिक संजालया वाल क्वाःगु दुसा संचार माध्यमतय् नितिं नं थ्व हे मसला जुयाच्वंगु दु।

न्यूरोडय् पार्किङ निषेध धाय्धुंकाः थीथी खँत पिहां वयाच्वंगु दु। बालेन मेयर जुया वय्धुंकाः यक्वं विवादित निर्णयत जुल। उकीमध्ये छगू खुल्ला मंचय् भूमिगत पार्किङ दय्केगु निर्णय। तःधंगु विरोध धुंकाः येँ महानगरं व ज्या न्ह्यःने यके मफुत। व धुंकाः बालेनं व्यापारिक भवनं निःशुल्क पार्किङ बीमाःगु नियम हःगुलिइ न्यायालयं नीजि सम्पत्तिइ महानगरं उकथं हस्तक्षेप याय्मज्यू धइगु कथं फैसला न्यंकाः बालेनया निर्णय लागू जुइके मबिल।

आः न्यूरोडया पार्किङ निषेधया निर्णय यानाः बालेनं छगू ला व्यापारिक कम्प्लेक्स विरुद्ध आम सर्वसाधारणयात ग्वाकेत स्वःगु व खुल्ला मंचय् पार्किङ दय्केमाल धकाः जनतायात हे नवाकेत स्वःगु धकाः बालेनया द्वपं लानाच्वंगु दु। न्ह्यागु धाःसां सडकय् हे पार्किङ याकेगु वा यायेगु पाय्छिगु खँ ला पक्कां मखु तर, पार्किङ निषेधया विरोध यानाच्वंपिनिगु पक्षं स्वयेबलय् निषेध हे जक समस्या समाधान मखु धइगु नं प्रष्ट हे जू। न्यूरोड धयागु येँ महानगरया दकले तःधंगु व्यापारिक केन्द्र खः। न्यूरोड दुने चिम मल्तानिसें लं, लाकां, लुँ थज्याःगु हरेक कथंया सरसामानया होलसेल, रिटेल व्यापार जुयाच्वनी। थन न्हिं करोडौंया व्यापार व्यवसाय जुइगु याः।

थौंकन्हय् व्यापार व्यवसाय क्षेत्रय् मन्दी वयाच्वन धइगु खँ वयाच्वंबलय् थज्याःगु व्यापारिक केन्द्रया व्यापार व्यवसाययात अझ थकाय्गु नितिं हे स्वय्माः, नकि झन क्वकाय्गु । पार्किङ मदइबलय् व्यापार व्यवसायलय् लिच्वः लाइगु पक्कां हे खः।  व्यापारिक क्षेत्रय् पार्किङया व्यवस्था माःगु हे नं खः। तर अथे धाय्वं सडकय् पार्किङ याके बी माः धयां नं जी मखु। न्यूरोड क्षेत्र तःधं।

अन पार्किङ याकेजीगु थाय् यक्वं दु । खतुं धरहरा व पुलांगु बसपार्कय् दय्काच्वंगु काठमाडौं टावरय् पार्किङया व्यवस्था याःगु दु। लाखौं सवारी साधन वय्ने जुयाच्वनीगु न्हूसतकया पार्किङया नितिं उलि थासं गाइगु नं मखु, अझ न्यूरोडया नितिं काठमाडौं टावर ला तापाः हे नं जू । मू सडकय् मयाःसे सडक जाम मजुइगु कथं, मू सडकं दुने पार्किङया व्यवस्था याय्ज्यू।

अन दुगु चुक, बहाः आदिइ पार्किङ याकेबी ज्यू। थन समस्या दु धाय्वं व्यवस्थापनपाखे वनेगु स्वयां निषेध याय्गु जक स्वःगु खनेदत। झारा जुल धकाः प्यं ध्यनाः जीमखु, निषेध मखु, व्यवस्थापनया लँपु मालेगु बांलाः खनेदु।