पत्रकार दबुया दँमुँज्यां नेवाः पत्रकारतलिसें संचार गृह सम्मानित
लहनान्यूज | चिल्लागा षष्ठी ११४१, चैत्र २१ गते शनिबाः
मातृभाषा पत्रकारिताया विकासय् योगदान ब्यूपिं नेवाः पत्रकारतलिसें संचार गृहतकं सम्मानित जूगु दु ।
म्हिगः मध्यपुर थिमिइ जूगु नेवाः पत्रकार राष्ट्रिय दबूया च्याक्वःगु दँमुँज्याय् जनआस्था वाःपौया प्रवन्ध सम्पादक वरिष्ठ पत्रकार राजेन्द्र स्थापितयात २०द्वः तका राशीलिसेंया ज्ञानज्योति लक्ष्मीप्रभा सिरपालं सम्मानित यात ।
अथे हे, नागरिककर्मी पत्रकार वृmष्ण किसीयात १५ द्वः राशीलिसेंया ज्ञानदेवी मणिरत्न स्थापित लुमन्ति पत्रकारिता सिरपाः लःल्हात । फोटो पत्रकारिताय् सक्रिय मिसा फोटो पत्रकार रेखा शाक्ययात १०द्वः तकालिसेंया बाबुराजा ज्यापु फोटो पत्रकारिता सिरपाः ब्यूगु खः ।
बुद्धधर्मया हसना व शिक्षाया प्रचार प्रसारय् योगदान ब्यूगु धासें बोधि टेलिभिजन भिक्षु कुमार काश्यप लुमन्ति पत्रकारिता सिरपाः ब्यूगु खः । बोधि टेलिभिजनया कार्यकारी निर्माता राजु नापितं १२ द्वः तका राशीलिसेंया उगु सिरपाः लःल्हाना कयादिल ।
उत्तरी व दक्षिणी निगुलिं मोहडां सगरमाथाया सफल यानाः वल्र्ड बुक अफ रेकर्डय् नां च्वकेत ताःलाःम्ह न्हापांम्ह व आःतक्कया छम्ह जक मिसा पत्रकार कल्पना महर्जनयात नं विशेष सम्मान याःगु खः । व हे कथं, नेपाल सरकारया न्यूनतम पारिश्रमिक निर्धारण समितिइ दुजलय् मनोनित पत्रकार ऋषिकेश श्रेष्ठयात लसहनालिसें हंगु खः । सम्मानित सकसितं मध्यपुर थिमि नगरपालिकाया प्रमुख मदन सुन्दर श्रेष्ठं दोसल्ला न्ययेकादिल सा वागमती प्रदेश सांसद राजेश शाक्यं हनापौ लःल्हानादिल ।
ज्याझ्वलय् नवासे. वागतमी प्रदेश सांसद शाक्यं झिदँ दयेधुंकाः नं दबूया थःगु हे भवन मदुगुलिइ दुःख प्वंकुसैं दबूया भवन दयेकेत ग्वाहालि यायेगु भाला थम्हं कयागु धयादिल । मध्यपुर थिमि नगरपालिका प्रमुख मदनसुन्दर श्रेष्ठं कोरोना महामारीयात ध्यानय् तयाः स्वास्थ्य मापदण्डया पालना यासें जात्रापर्व न्ह्याकेमाःगु बिचाः तयादिल ।
प्रेस काउन्सिल नेपालया कार्यवाहक नायः गोपाल बुढाथोकीं धर्मादित्य धर्माचार्ययात मातृभाषाया न्हापांम्ह पत्रकारया रुपं स्थापित यायेत प्रेस काउन्सिलं पत्रकार दबूलिसे सहकार्य यानाः ज्याझ्वः न्ह्याकेगु घोषणा यानादिल । नेपाल आदिवासी जनजाति पत्रकार महासंघका अध्यक्ष दण्ड गुरुङ, नेपाल पत्रकार महासंघपाखें गोविन्द चौलागाईँ, राष्ट्रिय दलित पत्रकार संघया वरिष्ठ न्वकू गोपाल बराइली, नेवाः देय दबूया केन्द्रिय नायः नरेश ताम्रकार, पत्रकार दबूया निवर्तमान नायः श्रीकृष्ण महर्जनं भाषिक पत्रकारिताया विकास व समावेशी, समानताया मुद्दा संस्थागत यायेत सकलें छधी जुइमाःगुलिइ बः बियादिल ।
पत्रकार दबूया केन्द्रीय नायः सुरजवीर वज्राचार्य, केन्द्रीय वरिष्ठ न्वकू नृपेन्द्रलाल श्रेष्ठ, केन्द्रीय मू छ्यान्जे सुनील महर्जन, दांभरिं सुरेन्द्रभक्त श्रेष्ठं सकसिगु मंकाः कुतलं पत्रकार दबू आः संस्थागत रुपं बल्लायेधुंकूगुलिइ बः ब्युसें अझ यक्व ज्या याये ल्यं दनिगु धयादिल ।
ज्याझ्वलय् वागमती प्रदेश सांसद शाक्य व मध्यपुर थिमि नगरपालिका प्रमुख श्रेष्ठं मंकाः रुपं पत्रकार दबूया स्मारिका ‘लुमन्ति पौ’ या विमोचन नं यानाद्यूगु खः ।
Categorized in राष्ट्रिय
