२०७७ माघ १२, सोमबार

न्हुदँ कोरोनामुक्त जुइमा

काजी | थिंलागा एकादशी ११४०,पुस २५ गते

हाकनं छकः न्हूदँ झीगु न्ह्यःने दु। स्वन्तिबलय् नेपाल सम्वतया न्हूदँ हनापिं झीसं हाकनं इस्वी संवतया न्हूदँ २०२१ यात लसकुस यानाच्वना।

साँस्कृतिक ल्याखं ला थुगु न्हूदँलिसे झीगु छुं कालबिल मदु । इस्वीया पात्रो स्वयाः झी छु नं ज्या याय्म्वाः । अथेसां थुगुसी धाःसा न्हूदँ सन् २०२१ नं झीगु सरोकार, झीगु च्यूताःया विषय जुयाच्वंगु दु । झीगु जक मखु, मुक्कं हलिंया च्यूताःया विषय जुयाच्वंगु दु ।सन् २०१९ या अन्त्यपाखे चाइनाया उहान शहरं कोरोनाभाईरस पिहांवल । उबले ला मेमेगु देशं खास हे छुं च्यूताः मतः । तर जब थ्वं विश्व महामारीया रुप काल, सकलसिनं महामारीया दुःख सीमाल । सन् २०१९ य् चाइनां शुरु जूगु महामारीं सन् २०२० मुक्कं दँयात ला मास्कमय हे यानाबिल । मुक्कं हलिं हे मास्क तयाः जुइमाल ।

थुगु महामारीं गबलें मुक्ति चूलाइ धकाः सकलें वाथावाथा कँकं हे सन् २०२० क्वचायावन । सन् २०२० क्वचालकि थुगु संक्रमण नं म्ह्वः जुयावनी ला धकाः धयाच्वँच्वं २०२० या अन्त्यपाखे वयाः धाःसा बेलायतय् न्हूगु प्रकारया भाईरस खनेदयावःबलय् सकलें हाकनं छकः ग्याय्माल । आः वयाः सन् २०२१ झीगु नितिं सुखदायी जुइ कि दुःखदायी हे जुइ धइगु अन्यौलया अवस्था जूगु दु ।अथेखःसां सन् २०२१ लिसें छुं आशाया जः धाःसा दयाच्वंगु दु । न्हूगु प्रकारया भाईरसलिसें थीथी देशं भ्याक्सिन नं पिकाःगु दु । थ्व बांलाःगु पक्ष खः । अथेजूगुलिं २०२१ सुखदायी हे जुइला धइगु आशा याय्थाय् नं ब्यूगु दु ।

विश्वया थीथी देशय् धमाधम भ्याक्सिन बीगु शुरु जुइधुंकल । छन्हु नेपाःया नं पाः ला वइ । तर गबले धइगु न्ह्यसः नं दनि । मेमेगु देशय् थें थन भ्याक्सिन सहज रुपं उपलब्ध जुइगु खँय् सकस्यां आशंका हे दु । भ्याक्सिन वइगु गबले, झीत बीगु गबले धइगु सकसिगु हे न्ह्यसः खः । तर आशावादी जुइ, याकनं हे बांलाःगु लिच्वः झीगु न्ह्यःने दइ धकाः आशा याय् ।

तर उबलेतक्क सकलें सतर्क जुयाः ज्याखँ न्ह्याकाच्वने । आः वयाः ला हाकनं लकडाउन यानाः छेँय् च्वनेगु स्थिती नं मदय्धुंकल । सतर्क जुयाः, आवश्यक स्वास्थ्य सुरक्षाया उपाय नालाः न्ह्याःवनाच्वने । सन् २०२१ सकसिगु नितिं भिं जुइमा, सकल विश्वयात बांलाय्मा, भिन्तुना।