दँय्दसं स्वन्तिइ नेवाः समुदाय दुने यक्व खँय् विवाद, चर्चा जुइ । दकले तःधंगु विवाद ला तिथि विवाद जुयाच्वंगु हे दु। अजूचायापुक हे दँय्दसं कार्तिक कृष्ण चतुर्दशी खिजापूजा व कार्तिक औंशी लक्ष्मीपूजाया तिथि छन्हुं हे लाइ। मेगु छुं हे नखःचखःया तिथिइ उकथं लाइमखु ।

तर खिचापूजा व लक्ष्मीपूजाया तिथि धाःसा दँय्दसं हे छन्हुं हे लानावःगु दु व गुखुनु लक्ष्मीपूजा यायेगु धकाः नेवाःत सकसितं थःगु आगं क्यनां ल्वाना हे च्वंगु दु। थुकिया नापं न्हूदँ नापं मेगु छगू खँ धइगु नेपाल सम्वतयात कयाः जुइ। नेपाल सम्वतयात सरकारी कामकाजय् छ्यलेमाल धकाः खुब सः थ्वइ । न्हूदँया माहौल सिधइ अले थज्याःगु सः नं सुनावनी । थज्याःगु दथुइ छगू खँ थन लुमंकेमाःगु खँ धइगु न्हूदँ राष्ट्रिय समारोह समितिया खः । दँय्दसं न्हूदँ राष्ट्रिय समारोह समितिइ न्हूम्ह नायः ल्यइ । न्हूम्ह नायः ल्ययेधुंकाः प्रधानमन्त्रीयात न्हूदँया समारोहलय् उपस्थित जुइत ब्वंवनी।

उगु इलय् प्रधानमन्त्रीया न्ह्यःने थीथी माग नं न्ह्यब्वइ। प्रधानमन्त्री न्हूदँया समारोहलय् उपस्थित जुयाः माग पूवंकेगु प्रतिवद्धता प्वंकी । स्वन्ति सिधःगुलिसें थ्व खँ नं दक्वं सिधइ । मेगु वर्षय् हाकनं व हे टेप रेकर्डर हायेके थें व हे खँ लिसा काइ । थ्व छगू वार्षिक कर्मकाण्डी ज्या अथवा धाये पितृया श्राद्ध दँय्दसं याये थें छगू औपचारिकताय् जक सिमित जू वने धुंकल। थुगुसी नं न्हूदँ राष्ट्रिय समारोह समितिइ प्रेमहिरा तुलाधरयात नायः ल्यल । देशय् महिला नेतृत्व दयाच्वंगु इलय् समारोह समितिइ नं मिसा नेतृत्व ल्यल धकाः यक्वसिनं च्वछाल। तुलाधर नेतृत्वया न्हूदँ राष्ट्रिय समारोह समितिया प्रतिनिधि मण्डल वनां देय्या अन्तरिम सरकार प्रमुख प्रधानमन्त्री सुशिला कार्कीयात नापलाःवन, न्हूदँ समारोह समितिय् उपस्थित जुइत ग्वय्दां नं छात । उगु इलय् समितिं प्रधानमन्त्री कार्कीया न्ह्यःने ११ बुँदे माग तःगु खः।

थुकथं माग थुगुसी जक तःगु मखु, दँय्दसं तयावःगु दु । थनथाय् येँया न्हूदँ राष्ट्रिय समारोह समितिया जक खँ मखु, यल, थिमिलिसें थीथी थासय्या न्हूदँ समारोह समितिं तयावःगु मागया नं खँ खः । दँय्दसं नेपाल सम्वतयात सरकारी ज्याखँय् छ्यलेमाल धकाः माग तइ। तत्कालीन प्रधानमन्त्री पुष्पकमल दाहालं ला नेपाल सम्वत ११२९ या न्हूदँ समारोहयात सम्वोधन यायेगु झ्वलय् नेपाल सम्वतयात राष्ट्रिय सम्वतया मान्यता घोषणा यासें सरकारी ज्याखँय् छ्यलावनेगु प्रतिवद्धता नं प्वंकादिल। व धुंकाः देशय् तःक्वः हे प्रधानमन्त्री हिलेधुंकल, तःम्ह हे प्रधानमन्त्री जुल।

सकसिनं नेपाल सम्वतयात सरकारी ज्याखँय् छ्यलेगु प्रतिवद्धता प्वंकावन, पूर्ण कार्यान्वयन थौंतकं जुइमफुनि। वर्तमान इलय् वयाः प्रधानमन्त्री ज्याकूलिसें सरकारी ज्याकूया लेटर हेडय् नेपाल सम्वत छगू ला उल्लेख यायेगु यात तर, पूरा तिथिमिति धाःसा मतःनि, व थासय् विक्रम सम्वत हे छ्यलाच्वंगु दनि। नेवाः समुदायं नेपाल सम्वतयात कयाः ताः ई न्ह्यवःनिसें सरकारयात तयावःगु माग ला सरकारी ज्याखँय् छ्यलाबुलाय् हयेमाल धइगु हे खत। वयां लिपा नेपाः देय्या अन्तरीम सरकार प्रमुख प्रधानमन्त्री सुशीला कार्कीया छगू न्हूगु प्रतिवद्धतां नेवाः समुदाय दथुइ न्हूगु लहर वःगु दु।

नेपाल सम्वतयात नेपाली नोटय् छ्यलेगु प्रतिवद्धता वःबलय् नेवाः समुदाय दथुइ लसता बाःवःगु दु। नेपाल सम्वतया आन्दोलनया थ्व छगू तःधंगु उपलब्धि नं तायेकेमाः। थ्व दक्वं खँया दथुइ प्रतिवद्धता कार्यान्वयनया खँ महत्वपूर्ण जुल। नेपाल सम्वतयात सरकारी ज्याखँय्, सरकारी लेटर हेडय् पूर्ण रुपं छ्ययेकेत दबाव बी फयाच्वंगु दु ला धाःसा लिसः मदु धकाः हे वइ। व हे कथं नेपाल सम्वत व शंखधरया अध्ययन, अनुसन्धान यायेगु नितिं सरकारपाखें छगू प्रतिष्ठान नीस्वनेगु धकाः नं प्रतिवद्धता वःगु खः। व प्रतिवद्धता नं आःतक प्रतिवद्धताय् हे सिमित जुयाच्वन तिनि।

प्रतिष्ठान नीस्वनेगु नितिं छुं कुतः जूगु, सरकारलिसे खँ ल्हाःवनेगु, दबाब ब्यूवनेगु ज्या जूगु थन नं खनेमन्त ।आः वयाः नोटय् नेपाल सम्वत छ्यलेगु प्रतिवद्धता वल । पात्र ह्यूसां सत्ता पक्षपाखें नेपाल सम्वतयात व्यवहार ह्यूगु खनेमदुगु अले न्हूदँ हनीगु थीथी समारोह समितिया दछिइ छकः जक न्ह्यलं चाइगु प्रवृत्ती हे यानां थ्व न्हूगु प्रतिवद्धता नं कार्यान्वयन जुइगुलिइ शंका हे दु । थुकी विशेष यानां येँया न्हूदँ राष्ट्रिय समारोह समिति, यल, ख्वप, थिमि, किपूलिसें देय्या थीथी थासय् दयेकीगु दयेकातःगु न्हूदँ समारोह समितिं हे भूमिका म्हितेमाःगु खः।

थःपिन्सं तयावःगु माग कार्यान्वयन याकेत न्हूदँया इलय् जक मखु, इलय्ब्यलय् थीथी कथं सरकारयात, सरोकारवाला निकाययात घ्वात्तुघ्वायेगु, दबाब बीगु ज्या यायेमाः । न्हूदँय् छकः हालेगु, न्हूदँया इलय् छकः माग तःवनेगु अले थःगु कर्तव्य पूरा जुल धइथें दछि तक द्यनेगु खःसा म्हपूजाकुन्हु छन्हु जक हालेगुया नं अर्थ मदु । दछिइ छकः पितृया श्राद्ध यायेथें जक यानाच्वनेगु खःसा थज्याःगु समारोह समितिया औचित्य पुष्टि जुइमखु ।

Categorized in राष्ट्रिय