दक्षिण पश्चिम नाइजरय् सशस्त्र पुचलं ५८म्ह सर्वसाधारणया हत्या
चौलाथ्व चतुर्थी ११४१, चैत्र ४ बुधवाः
दक्षिण पश्चिमी नाइजरय् सशस्त्र पुचःया हताःलय् म्होतिइ ५८म्ह सीगु दु । साप्ताहिक बजां लिहाँवयेगु झ्वलय् बन्दुकधारीपिन्सं उपिं सर्वसाधारणयात स्यागु अन्तर्राष्ट्रिय समाचार संस्थातयेसं न्ह्यथंगु दु ।
सोमबाः नं सरकारी सेनालिसे विद्रोहीपिनि माली व बुर्किन फासोया सीमा लिक्कसं ल्वापु जूगु खः । उगु क्ष्ोत्रय् अलकायदालिसे् लिक्क दूगु विद्रोही पुचःया ज्यापहः सक्रिया दूगु अधिकारीपिन्सं न्ह्यथंगु दु ।
नाइजरया सरकारी प्रवक्ता अब्दुरेहम जाकारीयां घटनाया पुष्टि यासें ३न्हूया राष्ट्रिय शोकया घोषणा याःगु खः । आक्रमणकारीतय्सं वंगु जनवरी २ खय् टिल्लेबमरीया २ गू गाँमय् हताः याना म्होतिइ सीच्छम्ह सर्वसाधारणयात स्यागु खः ।
अप्वयावंगु हिंसा पश्चिमी अफ्रिकाया सोहेल क्षेत्रय् तच्वकं सुरक्षा संकटया छगू हिस्सा जूगु अधिकारीपिन्सं न्ह्यथंगु दु । थ्वयान्ह्यःया अप्वः धैथें हताः नाइजर, माली व बुर्किन फासोया सीमा लिक्क जूगु धाःगु दु ।
सेनां तिल्लेबारी क्षेत्रय् याःगु जवाफी कारवाहीस धाःसा २०१९या डिसेम्बरय् ७०म्ह व जनवरीइ ९०म्ह विद्रोही सीगु खः ।
Categorized in अन्तर्राष्ट्रिय
