जि येँ महानगरया मेयर खः, दल स्वया जनप्रतिनिधिपिनिगु उपेक्षा यायेमखु : मेयर शाक्य
शोभा श्रेष्ठ | बछलाथ्व दशमी ११४१,असार ६ आईतवाः
येँ महानगरपालिकां सार्वजनिक यागु आर्थिक बर्ष २०७८÷२०७९ या नीति तथा कार्यक्रम सर्वसम्मतं पारित यागु दु ।
असार ३ गते येँ महानगरपालिकाया मेयर विद्यासुन्दर शाक्यं गुक्वःगु नगरसभाया न्हापागु वैठकय् नीति–तथा कार्यक्रम सार्वजनिक यानादीगु खः। उगु बैठकय् उपमेयर नाप काँग्रेस निकटया जनप्रतिनिधिपिन्स नीति–तथा कार्यक्रमबारे भचा अध्ययन यायेमाःगु धासे निन्हुया ई मागु मागयागुलि मेयर शाक्यं छलफल निन्हुया लागि स्थगन यागु खः।
मेयर शाक्यं सुझाव ग्रहण यासे उपमेयर नाप दक्को वडाध्यक्षपिनिगु पार्टीया प्रतिनिधि स्वया जनप्रतिनिधिया हैसियतं ज्यायायेत सुझाव बिगु खः। ‘जिमिगु कार्यकालया लिपागु नीति, कार्यक्रम तथा बजेट हयागु दु। वंगु दँय् थे सकसिगु निर्णय सर्वसहति जुइ,’ शाक्यं धयादीगु दु, ‘जिं छिकपिन्त इनाप याये चाहे जु। छु न दलया टिकट कया झीपि निर्वाचनय् उम्मेदवार जुया।
तर, निर्वाचन त्याका वये धुका झी जनप्रतिनिधि खः। शाक्यं आन्तरिक समस्यायात छलफलयका माध्यमपाखे हल याये, म्वामदुगु मिडियावाजी मयायेत सुझाव बिगु दु। मेयर शाक्यं नगरसभाय् पेस जुगु नीति तथा कार्यक्रमयात अझ परिपक्क दयकेत वःगु सकारात्मक सुझावं बालागु नीति–तथा कार्यक्रमय् राजनीतिक लेप बिइ मज्यू धका सुझाव बियादीगु दु। ‘असार १० गते बजेट हयेमाःगु कानुनी बाध्यता दु,’ वयकलं धयादीगु दु, ‘नीति–तथा कार्यक्रमय् अज्यागु असहमति तये माःगु छु मदु।
अझ बालाक्क अध्ययन याना वयकःपिनिगु सुझावयात सारकात्मक रुपं अझ बालाक यकेगु जुइ।’ शाक्यं नीति तथा कार्यक्रमय् १ सय बेडया ‘काठमाडौँ महानगर विशेष अस्पताल’ स्थापना यायेगु, विद्युतीय सवारी करय् शतप्रतिशत छुट बिइगु, कोभिड–१९ या महामारीपाखे प्रभावित करदातायातल विशेष छुट÷सहुलियत बिइगु, महानगरवासीपिनिगु ‘नागरिक स्वास्थ्य विमा कार्यक्रम’, ‘छगु वडा छगु नमूना विद्यालय कार्यक्रम’ सहरी स्वाथ्य क्लिनिकपाखे विशेषज्ञ चिकित्सक नाप निशुल्क सेवा थेजाःगु महत्वपूर्ण कार्यक्रम हयागु जानकारी बिगु दु।
Categorized in राष्ट्रिय
