थःगु प्रतिकथं मन्दः दय्काः अनेक अर्थ क्यंकाः पुज्याय्गु विधियात हे म्हपुजा धाइगु खः । नेवाःतय् थ्व परम्परा गुबलेनिसें वल धकाः धाय्मफुसां नेवाः धाय् ससांनिसें वःगु खः धइगु अनुमान याय्फु । नेवाःत च्वनीगु थाय्यात नेपाःगाः धकाः धाइगु खः । नेपाःगालय् सु गुबलय् गनं वल धैगु खँ न्ह्यागु थजुइब्यु, थन च्वँच्वं नेवाः जुयाच्वंगु खः । उकिं नेवाः व म्हपुजा छगूया मेगुनापया अभिन्न परिचयया खँ जुयाच्वंगु दु।

 

थौंकन्हय्या भासं जाति, धर्म संस्कृति न्ह्यागु धा, उमिसं पालना याक्व खँ नेवाः जुयावनीगु । नेवाः विविधतां जाः खः तर, व हे उमिगु एकताभाव खः । गथे नसा नय्बलय् नेवाःतय् पंचक्वाः दइगु छ्यालाक्वाः दइगु, बूबः क्वाति दइगु सायद मेगु जातिइ मदु । नसा, त्वँसा, त्युसा न्ह्यागु हे खँ ज्वीमा, नेवाःतय् विश्व संरचनानाप अलग कथं सीदयाच्वंगु खँ यक्व दु । नेवाःया जीवनवृत्तिया सम्पदा अतुलनीय कथं यक्व खँ स्वय्दु । कला, सीप, ज्ञान, विज्ञानया खँ संसारय् न्ह्याम्हसिया न्ह्यागु प्रकारं खनेदयाच्वंसां नेपालं छ्यलीगु विषयवस्तुया खँत अलग्ग कथं सीदु । नेपालय् धर्मशास्त्र धकाः अनेक द्यःपिं व भूत, प्रेत, पिशाच आदियात संस्कार संस्कृति धकाः मनूतसें हनावयाच्वंगु दु । वहे ज्वःलाःकथंया विवरण नेवाःतसें हनेगु याःसां थःगु पनं हनेचनेया व्यवहार क्वातुकाः थःगु पहिचानकथं छ्यलाबुलाय् हयाच्वंगु दु । उकिं बाजं, प्याखं धा, कासा ख्यः धा थःगु हे पन ब्वयाः नेवाः जुयाया परिचय बियाच्वंगु दु । थथे धाय्बलय् धृष्टता थें च्वनी तर द्यः देगः, आगंछेँ छकः दुवालाः स्वतधाःसा न्ह्याथेंजाःम्हेसिनं नं थःगु तालबालनाप तापाःगु खनी । मेपिनि द्यः मनू जुइ, मनू द्यः जुइ । नेवाःतय् द्यः जुइमा, मनू जुइमा, थः जुइ । 

स्वनिगः

राजधानी जुयाः नेपाः जुयाच्वंगु खँ थौं न्ह्याथेजाःगु व्यवस्था वःसां नेवाःया इतिहास ल्वःमंकाः भ्याःभचा चीधंगु खँ धकाः नं सुनानं धाय्फइगु अवस्था मदु । न्ह्याम्ह न्ह्याथासं वःगु जूसां नेपाःगालय् हे वःगु खः, नेवाः लुमंकाः हे च्वनीगु खः । नेवाःत धइपिं हे विश्वन्यंकया थीथी सभ्यतायापिं नेपाःगालय् दुहां वयाः नेवाः जूगु खः । आः नं नेपाःगालय् च्वं वक्व नेवाः खः छाय्कि नेवाः हे नेपाः खः । थौं नेपालय् धकाः गुलि नं  विकास जुल, नेवाःया हे विकास जूगु खः । थौं नेवाः खः मखु धकाः हालीपिं जुयावयाच्वंगु दु । नेवाः मथूसा मेपिं गनं वल । नेपाःया विकास जूगु धाय्गु मखुसा विकास याय्गु थाय् हे गन दत, गनं वल । नेवाःया नखःचखः, जात्रापर्व, संस्कार, संस्कृति न्हनावन कि रुप हिलाः बांलानावल । नेवाः जुयाः दृष्टि गाकाः स्वय्त थौंकन्हय् अध्ययन जुया वयाच्वंगु दु । पिनें वःपिं नेवाः जुयाः वन कि, भूत, प्रेत, बोक्सीथें चाःचाः हिलाःच्वंच्वन धैगु खँ वाःमचायाच्वन । धाय्माःगु गुलि नं नेपाःगालय् वल, सकलें नेवाः जुल । थ्वहे नेवाःया प्रकृति खः । 

 

नेपाःगालय् म्हपुजा याइपिं नेवाःत दत्तले नेपाः दयाच्वनी । नेपालय् च्वना धकाः धाइपिं दक्वसिनं म्हपुजा याय् हे माः धइगु मदु । म्हपूजा याइपिनिगु गौरवय् थःपिं थः जुयाः वनेगु धैगु हे नेपाःया अस्तित्व दइच्वंगु जुइ । थौं नेवाः धकाः जाति व भाषां जक परिभाषित जुयाच्वनेगु खःसा उन्नति, प्रगति व विकास धइगु हे नामय् जक जुयावनी । नेपाःया एकता दु धयागुलिइ सामूहिक विचार ज्वीमाःगुलिइ ध्यान मवन धाःसा नेपाःया संस्कृति संस्कार भ्वय्कनावनी । नेपालय् थःगु हे भाषा, लिपि, कला, सीप दुगु खँ नेपाःमि मात्रया साझा सम्पत्ति जुयाबिल धाःसा नेपाःमि सुइत धाय्गु । नेपाःमि व हे नेवाःया विकास खः । नेपालय् थःगु हे सम्वत् दुगु खँ नेपाःमिं हे मथुइक च्वँच्वं सलंसः दँ पुलावनेधुंकल । नेपाःया गौरव थुइकु थुइकुं नेपालसम्वत थौं ध्वाथुयावःगु दु । थःगु देसय् थःगु संवत छ्यलेगु थौं अभियान तकं यानाः न्ह्यावःनेमाःगु अवस्थातकं जुयाः दिं न्ह्यानावनाच्वंगु दु।

 

थःगु बस्तु थम्हं छ्यले मसयाः अले मफयाः थःथम्हंतुं क्वह्यनाः च्वनेमाःगु दु । थौं नेपालयसम्वत हाहां म्हपूजा कमजोर जुयाः म्हपुजा हे अवमूल्यन थें जुयावनाच्वंगु वाःमचाया वनाच्वंगु दु । स्वन्तिया दक्व ई नेपालसम्वतया ज्याझ्वलं नुनाच्वंगु दु । स्वन्तिया संस्कृति स्वना तय्थें जुयाः विकृति न्ह्याःन्ह्याः वयाच्वंगु दु । म्हपुजाय् छ्यलेगु अजर अमर भाःपाः तयातःगु वस्तु फुक नक्कलि प्रयोग जुया वइच्वंगु दु । स्वां थेंजाःगु, सिसाबुसा थेंजाःगृु हे नक्कली प्रयोग जुइगु । घनाःश्री थेंजाःगु नेवाः धूनय् नं नेवाः बोली, नेवाः म्ये मखय्धुंकल । नेवाः धाधां नेवाःपन तंकाच्वंपिं दैवैच्वंगु दु । नेवाः छेँय् नेवाःपसः तैपिं मदय्धुंकल । न्हूँदया ¥याली वनीबलय ¥यालीया लँय् लँय् च्वंगु छेँया झ्यालं क्वस्वःवपि झ्यालं व लँय् ताय् अभीरं ह्वलाः लसकुस याःपिं मदयधुंकल । मूल समारोह नं प्रधानमन्त्रीयागु थें जुइधुंकल ताकि प्रधानमन्त्री मवलकि नखःथें हे मच्वनीगु जुइधुंकल । मूमूगु विशेषताया थाय्बाय्, लँ, ख्यः त्वःताः यंकाच्वंगु जुइधुंकल । त्वःते मखु धकाः न्ह्याक्व हाःसां मुआब्जाया लागिं जक हालाः ल्हातिइ जाय्क ध्यबा तयाः सुंक च्वनीपिं जुइधुंकल।

 

सकलें नेवाःयात सम्पन्न जाति धयातःगु खः । थौं विपन्नताया खँ न्ह्यथनेबलय् लाज, शरम धर्मया ख्याल मदुपिं थें जुयाः निरिह जुइमाःगुलिइ वास्ता त्वःफिनाः वनाच्वंगु, मस्यू पहः याय्माःथें जुया वनाच्वंगु दु । व्यवहारय् स्वन्तिया भिंतुना दुग्यनाः म्हुतुइ जक भिंतुना घानावःथें जुइधुंकल । न्हूदँ धाय्गु हे, स्वन्ति धाय्गु हे अमेरिका लुमंथें जुयावःगु खँ लुमंके मालेधुंकल । थःगु देसय् मयः धाःगुलिं विदेशय् झःझः धाय्केनु धयाथें जुयावयाच्वंगु दु । 

 

धात्थेंला नेवाः हे स्वन्ति खः । थौं थ्व खँ इलं नुनायंकु थें जुयाच्वनाच्वंगु दु । म्हपुजाया रुप हे मालेमाःथें जुइधुंकल । नेवाःतय्गु संस्कृति खः भाषा खः, थितिबिति खः । न ज्याया मतलब, न भ्वय्या मतलब थें जुयावनाच्वंगु दु । धाय्बलय् जिगु जिगु याय्बलय् जुइबलय् मतिइ वःथें जुइधुंकल । थःथम्हं तुं च्वछाय्गु बानी जुइधुंकल । अहोरुपमहोध्वनि।