यलया चक्रबहिलिइ ग्यास विष्फोटय् लानाः छगू हे परिवारया ४म्ह सित
कछलाथ्व द्धितीया ११४२, कार्तिक २० शनिवाः
यलया चक्रबहिलिइ ग्यास सिलिन्डर बिस्फोट जूबलय् छगू हे परिवारया प्यम्ह सीगु दु ।
शुक्रबाः सनिलय् म्हपूजाया तयारी यानाच्वंगु इलय् यलया चक्रबहिलिइ चिब्यागु गल्ली दुने लाःगु छेँया स्वतजालय् जा थुइगु ग्यास सिलिन्डर बिस्फोट जूगु प्रहरीं न्ह्यथंगु दु ।
सीपिंलय् ६५ दँया छेँथुवाः लक्ष्मीकृष्ण ताम्रकार, ३५ दँया भौम्ह रचना ताम्रकार, ३५ दँयाम्ह हे म्ह्याय् अञ्जना ताम्रकार व १० दँया छय्म्ह निर्जल ताम्रकार लाःगु दु । घटनाय् ४२ दँया काय्म्ह निरज ताम्रकार व ३२ दँया भौम्ह सिर्जना ताम्रकार तसकं घाःपाः जूगु दु ।
उमित वासः यायेत पाटन अस्पतालय् भर्ना याःगु दु । ग्यास विस्फोट धुंकाः च्याःगु मिं छेँ नं च्यानाः पूवंक हे क्षति जूगु दु । घटना जूगु इलय् छेँय् ११ दुगु खः । न्याम्हेसित धाःसा सकुशल उद्धार यानागु प्रहरीं न्ह्यथंगु दु ।
