छाय् विवाद जुल शवदाह गृह
लहनान्युज | कछलाथ्व तृतीया ११४२, कार्तिक २१ आईतवाः
स्वनिगलय् घाट वा शवदाह याय्गु थाय्या विषयस नं इलय्ब्वलय् विवाद जुयाच्वनेयः। गबलें गनं परम्परानिसें सी उयावःगु घाटय् छेँ दय्काः च्वंवःपिन्सं सी उइके बी मखु धयाः विवाद जुइयःसा गबलें बस्ती दुने हे सी उइत स्वइबलय् स्थानीयं पनाः विवाद जुइयः। यलया शंखमूलय् आः थथे हे जूगु दु। यल महानगरपालिकां यल शंखमूलय् आवास क्षेत्र दुने हे विद्युतीय शवदाह गृह दय्केत्यंबलय् स्थानीयं थुकिया विरोध याःगु दुसा महानगरपालिकाया थुगु निर्णयया विरोधय् स्थानीयं लगातार संघर्षया ज्याझ्वःत यानावःगु दु।
स्थानीय पुस्तौ न्ह्यःनिसें कृषि यानावःगु उगु थासय् २०६१ सालय् नगर विकास ज्याकुथिं वागमती फाँट जग्गा एकीकरण आयोजना अन्तर्गत टाउन प्लान याःगु खः। आः उगु थाय् आवास क्षेत्रय् लाः । निर्णय कथं शवदाह गृह दय्केत महानगरपालिकां कित्ता नम्बर १०५७ अधिग्रहण याय्धुंकूगु दु। उगु जग्गाया क्षेत्रफल १ रोपनी ३ आना दु।
महानगरपालिकां स्थानीयलिसे छुं हे कथं सहलह मब्याकूसे उगु थासय् शवदाह दय्केगु निर्णय याःगु धासें स्थानीय वासिन्दा आः संघर्षय् कुहांवःगु दु । शवदाह गृह दय्केत्यंगु उगथु थाय्लिसें पुलांगु घाट नं दु। अनया गुथियारतलिसे नं महानगरपालिकां छुं हे सहलह याःगु खनेमदु। स्थानीयं सञ्चारमाध्यममार्फत जक उगु थासय् शवदाह दय्केत्यंगु धकाः स्यूगु खः। ‘थन शवदाह गृह दय्के ज्यू वा मज्यू धकाः सहलह वा खँल्हाबल्हा याय्त न वडा ज्याकुथिं आवश्यक खंकल, न महानगरपालिकां’ मणिडोल टोल सुधार समितिया नायः राजेन्द्र तण्डुकारया धापू खः।
सरकारी वा गैरसकारी निकायं छुं हे आयोजना न्ह्याकेगु निर्णय याय् न्ह्यः सम्भाव्यता अध्ययन याय्माःगु प्रावधान दु। अथे हे, निर्णय याय्धुंकाः प्रस्तावित योजनाया वातावरणीय व सामाजिक प्रभाव मुल्याकंन याय्माः। वातावरण संरक्षण ऐन र वातावरण संरक्षण
नियमावली २०७६य् आयोजना न्ह्याके न्ह्यः वातावरणीय प्रभाव मुल्यांङ्कन याय्माःगु धयातःगु दु । उगु नियमावलीया दफा ३य् उकिया बारे विस्तृत व्याख्या यानातःगु दु।
‘सम्भाव्यता अध्ययन वा स्थानीयया राय, सुझाव मकाःसे याःगु निर्णययात हचुवाय् याःगु निर्णय धाय्गु कि मधाय्गु ?’ मणिडोल टोल सुधार समितिया नायः राजेन्द्र तण्डुकारं न्ह्यसः तसें स्वानादिल, ‘नगर विकासं बस्ती दय्केगु योजना हःगु थासय् स्थानीययात जानकारी हे मब्युसे शवदाह गृह दय्केगु ? थ्व जिमित गुगु नं हालतय् मान्य जुइमखु । थुकिं बस्तीयात दुषित दयेकी।’
समितिं महानगरपालिकाया निर्णयया विरोधय् वंगु माघ २५ गते जिल्ला प्रशासन ज्याकू यलया प्रमुख भगिरथ पाण्डेयात ज्ञापन पत्र ब्यूगु खः। आः उगु निर्णयया विरोध यासें वडाया थीथी थासय् हाकु ब्यानर खाःगु दु। उमिसं वंगु फागुण ३० गते बुधबाः वडा ज्याकू घेराउ याःगु खः। चैत्र ३ गते सोमबाः वडा व महानगरपालिका घेराउलिसें जुलुस पिकाःगु खः।
११ नम्बरया वडाध्यक्ष इन्द्रमान महर्जनं उगु ज्याया लागिं वडां सिफारिस मयाःगुलिं थःपिन्सं छुं हे मस्यूगु धयादिल। ‘मेयरं छुं हे सल्लाह मयाःसे छक्वलं बोर्डय् प्रस्ताव हल। सुनां विरोध मयाः, स्थानीयया विरोध शवदाह प्रविधिप्रति मखसें उगु थाय्या ल्यज्याप्रति हो’ समितिया न्वकू नारायणलाल तण्डुकारं धयादिल। शवदाह गृहया लागिं काय्त स्वःगु जग्गाया क्षेत्रफल नं मगाःगु स्थानीयया धापू दु। समितिया न्वकू नारायण तण्डुकारं लिपांगु संस्कारया लागिं अन्त्येष्टीया ज्या, श्रद्धाञ्जली बीगु, सँ खाय्गु थाय्, शवबाहन, पार्किङ याय्गु थाय्, किरियापुत्रीय थाय् लिसें म्ह्वतिं ६ रोपनी जग्गा मालीगु धयादिल।
थ्व हे विषयस स्थानीयं माघया लिपांगु वाः व वंगु सोमबाः यानाः निक्वः महानगरपालिकाया मेयर चिरिबाबु महर्जनलिसे खँल्हाबल्हा याय्धुंकूगु दु। मेयरं जिमिगु अहमतियात शान्त जुयाः न्यनेगु पलेसा अःखतं थःगु हठ व दम्भ क्यंगु स्थानीयया द्वपं दु। मेयरं स्थानीयया विरोधयात अल्पबुद्धिया पराकाष्ठाया नां ब्यूगु धासें न्वकू दिपेश तण्डुकारं धयादिल ‘खँ न्यनेगु, तर्क तयाः खँल्हाबल्हा याय्गु स्वयां अमर्यादित व अलोकतान्त्रिक शैलीइ मेयर न्ह्यःने वयाच्वंगु दु।’
मेयर महर्जनं शंखमूलय् अप्वःथे यलमिया दाहसंस्कार जुइगु न्ह्यथँसें विद्युतीय शवदाह गृह अन अत्यावश्यक जूगु धयादिल । शंखमुल नेपालया दक्कले पुलांगु घाट खः। थुकियात निगूगु पशुपति नं धाइ।खुल्ला वातावरणय् सीम्ह उइलबय् वातावरण विनाश जुइगु जूगुलिं विद्युतीय शवदाह गृह दय्केत्यनागु प्रमुख महर्जनं धयादिल।
सिँ च्याकाः सी उइबलय् जुइगु वन विनाश नं थुकिं पनीगु मेयर महर्जनया बिचाः खः। महानगरयात विद्युतीय शवदाह याय्गु मेशिन एभरेष्ट बैंकया नायः बि.के. श्रेष्ठं सामाजिक उत्तरदायित्व अन्तर्गत उपलब्ध याकेत्यंगु खः। शुरुइ शवदाह गृह वडा नं ९ बालकुमारीइ तय्त स्वःगु खः। अनया वडाअध्यक्ष लिसें प्रवक्ता राजु महर्जनं स्थानीयं विरोध याय्फुगु आंकलन यासें अन मतय्त इनाप याःगु सीदुगु दु।
Categorized in राष्ट्रिय
