सत्तारुढ दलपिन्स सञ्चालनय् ग्वाहालि यायेगु निति ११ म्ह सदस्यीय समन्वय समिति दयकूगु दु।

नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी व राष्ट्रिय जनमोर्चाया शीर्ष नेतापि थौं च्वंगु बैठकं ११ म्हेसिगु सदस्यीय समन्वय समिति दयकूगु दु।

समन्वय समितिइ प्रधानमन्त्री शेरबहादुर देउवा सदस्य जुगु मदु। तर थः हरेक बैठकय् वयेगु धका धाउगु दु। समितिइ सत्तारुढ गठबन्धनय् दुपि दक्को दलपाखे निम्ह निम्ह सदस्य च्वंगु दु सा सरकारया पाखे सञ्चार तथा सूचना प्रविधिमन्त्री ज्ञानेन्द्रबहादुर कार्की च्वंगु दु।

माओवादी केन्द्रया नेता नारायणकाजी श्रेष्ठया कथं उगु समितिइ कांग्रेसपाखे वरिष्ठ नेता रामचन्द्र पौडेल व पूर्वमहामन्त्री कृष्ण सिटौला, माओवादी केन्द्रपाखे पुष्पकमल दाहाल प्रचण्ड, एकीकृत समाजवादीपाखे माधवकुमार नेपाल व जनता समाजवादी पार्टी (जसपा) पाखे उपेन्द्र यादवपिनिगु नां बिउगु दु।

स्वगु हे दलं लिपा छम्ह छम्हेसिगु नां बिइ धका धाउगु दु। अथेहे राष्ट्रिय जनमोर्चापाखे चित्रबहादुर केसी व दुर्गा पौडेल सदस्यय् च्वंगु दु।

Categorized in राष्ट्रिय