झीगु देय् नेपाःया छगू सम्पत्ति धइगु हे हस्तकला खः । नेपाःया नेवाःत हस्तकलाया खँय् यक्व हे न्ह्यःने लाः । विशेष यानाः यलयात ला हस्तकला नगरी कथं ऋचबात ऋष्तथ हे धाय्धुंकूगु दु । हस्तकलाया बजारयात तब्याका यंकेफःसा थुकिं नेपाःयात आर्थिक रुपं यक्व हे लबः बी फइगु खः । नेपालय् उत्पादन जुइगु हस्तकलाया सामग्रीया पिने देशय् माग नं तःधं हे धाय्फइ । तर राज्यपाखें धाःसा अपेक्षा याःकथं हस्तकलाया बजार तब्याकेत, कलाकारयात तिबः जुइकथं खास हे छुं कथं स्यल्लाःगु पलाः ल्ह्वंगु धाःसा खनेमदु।

थज्याःगु अवस्थाय् थीथी संघसंस्थापाखें इलय्ब्यलय् जुइगु हस्तकला व्यापार मेला छगू बांलाःगु माध्यम जुयाच्वंगु खनेदु । नेपाल हस्तकला महासंघं नं नियमित रुपं हस्तकला व्यापार मेलाया ग्वसाः ग्वयावःगु दु । थुगुसी महासंघं १८क्वःगु हस्तकला व्यापार मेला अले १६क्वःगु कला धेंधें बल्लाःया ग्वसाः ग्वय्त्यंगु दु । महासंघं थुकिया मुक्कं तयारी पूवनाः थःपिं मेला न्ह्याकेत तयार जुयागु न्ह्यथंगु दु । महासंघं सोमबाः छगू पत्रकार सम्मेलन यासें वइगु मंसिर ३ गते देखि ५ गतेतक्क येँया वौद्धस्थित होटल हायात रिजेन्सीइ मेला न्ह्याकेत्यनागु जानकारी ब्यूगु दु । मेलाय् थीथी हस्तकलाया विधाया १२० स्वयां अप्वः स्टल दइगु धाःगु दु।

न्हापाया मेलाय् हस्तकला वाहेकया नं स्टल दइगु जुयाच्वंगुलिइ थुगुसीया मेलाय् धाःसा विशुद्ध हस्तकलाया जक स्टल दइगु मेला कजि अले महासंघया न्वकू रवीन्द्र शाक्यं जानकारी बियादिल। ‘न्हापा न्हापाया मेलाय् जिमिसं हस्तकला बाहेकया सामग्रीयात नं थाय् बिया, तर थुगुसीया मेलाया छगू विशेषता धयागु, मुक्कं हस्तकलाया सामग्रीया जक हे स्टल दइ।

थुगु विशुद्ध रुपं हे हस्तकलाया हे मेला जुइगु जूगु दु’ कजि शाक्यं धयादिल । शाक्यया कथं मेलाया नितिं अप्वःथे स्टल बुकिङ जुइधुंकूगु दु। मेलाया मेगु आकर्षणया रुपं छगू हे थासय् हस्तकला ज्वलंया बृहत ब्वज्या अले मीज्या, समयसापेक्ष मेड इन नेपाल, मेक इन नेपाल अवधारणा कथं वस्तुया ब्वज्या, परम्परागत अले नवोदित समसामयिक हस्तकला विधाया कला धेंधें बल्लाः अन्तर्गत परम्परागत–जडाऊ कला (फिलगिरी), समसामयिक प्राकृतिक रेशा (नेचुरल फाइवर), अर्मूत सांस्कृतिक सम्पदा पिब्वय्गु, ईकला नेपाल अनलाईन पोर्टल अनावरण, हस्तकला ट्रेड डाईरेक्टरी व साधना माला सफू बिमोचन, (Inheritance) शिप हस्तान्तरण अले पुस्तान्तरण ज्याझ्वःयात ग्वसाः खलकं न्ह्यःने हःगु दु।

राष्ट्रिय अभिलेखालयया ग्वहालिइ दुर्लभ अभिलेख या नं ब्वज्या याइगु जूगु दु।तारा गाउँ कल्चर सेन्टरया हलय् उत्कृष्ट हस्तकला ज्वलंया कला ब्वज्या, निर्यातजन्य ३८ विधाया हस्तकला ज्वलंया ब्वज्या NNSW एकद्वार भन्सार प्रणाली बिषयक अभिमुखीकरण कार्यक्रम आदि नं याइगु जूगु दुसा उत्कृष्ट स्टल सिरपाः घोषणा, थीथी विधाय् जीवन पर्यन्त संलग्न ७० दँ पूम्ह जेष्ठ कलाकारयात सम्मान व हस्तकलाया उत्कृष्ट निर्यातकर्ता, उत्कृष्ट उद्यमी अले दँया उत्कृष्ट कलाकारयात सम्मान कार्यक्रम तकं दुगु मेला कजि शाक्यं धयादिल।

शाक्यया कथं मेलाया उलेज्या प्रधानमन्त्री शेरबहादुर देउवां यानादीसा मेला अवलोकनया लागिं थीथी देय्या कुटनीतिक नियोगया राजदूत अले उच्च पदस्थ अधिकारीतय्त नं ब्वंगु दु ।मेलामार्फत हस्तकला क्षेत्रया उद्यमी व्यवसायीं स्वदेशी अले विदेशी व्यापारीलिसे स्वापू दय्काः व्यापार व्यवसाययात प्रवद्र्धन याय्गु ह्वःताः चूलाकी । दँय्दसं छगू निश्चित इलय् थज्याःगु मेलाया आयोजनां न्हून्हूगु हस्तकलाया ज्वलंया उत्पादन, डिजाइन, विकास व वस्तु विविधिकरण प्रोत्साहन चूलाइगु नं खनेदु । हस्तकलाया क्षेत्रय् दयाच्वंगु लिसें सुलाच्वंगु सीप, कला व प्रविधिवारे जानकारी कालबिल याय्गु नितिं नं थज्याःगु मेला अतिकं ज्याख्यलय् वःगु खनेदु । मेलां स्वदेशय् हे लजगाःया लकस दय्केगु, हस्तकलाय् न्हूगु पुस्तायात आकर्षित याय्गु नितिं नं ग्वहालि जुइगु ग्वसाः खलःया अपेक्षा दु।

मेलाय् न्हिं झण्डै १० द्वःनिसें २० द्वः व अप्वःलय् छगू लखं अवलोकन याइगु, प्रत्यक्ष कारोबार व व्यवसायिक अर्डर तकं यानाः स्वंगूनिसें न्यागू करोड तकातक्कया कारोबार जुइगु अनुमान याःगु दु । लिसें मेलाय् प्रवेश टिकट न्यानाः मेला अवलोकन याइपिं आगन्तुकतय्त विशेष आकर्षक डोर प्राइजया तकं व्यवस्था याःगु दु ।नेपालया मौलिक कलाया रुपय् दुगु परम्परागत हस्तकलायात थनया कलाकार कालीगढं उत्पादन याःगु हस्तकलाया ज्वलंमार्फत स्वदेश व विदेशय् व्यापार व्यवसाय प्रवद्र्धन याय्त हस्तकलाय् ल्हाः तयाच्वंपिं कलाकार, कालीगढयात प्रोत्साहन यानाः सीप हस्तान्तरण यानाः झीगु देय्या मौलिक कलाकृति अन्र्तराष्ट्रिय बजारय् तकं प्रवद्र्धन याय्माःगुलिइ महासंघं बः बियावःगु दु।

व हे आज्जुकथं २०४८ निसें थःगु बार्षिक क्यालेण्डरया रुपं उद्योग, वाणिज्य तथा आपूर्ति मन्त्रालय, व्यापार निकासी तथा प्रर्वद्धन केन्द्रया सहकार्यय् मेलाया ग्वसाः ग्वयावःगु दु ।मेलां कोरोना महामारीं क्वदलाच्वंगु हस्तकलाया आन्तरिक अले बाह्य बजारयात प्रवद्र्धन यानाः देय्या अर्थतन्त्रय् तिबः जुइगु जक मखसें स्वदेशय् हे लजगाःया ह्वःताः दय्केत अले राष्ट्रिय व अन्र्तराष्ट्रिय क्षेत्रय् न्याइपिं व मीपिन्त छगू हे दबुलिइ मुंकीगु, न्हूपिं उद्यमी व्यवसायीयात बजार पहँुचया ह्वःताः बीत लिसें नेपाली तजिलजिलिसे हस्तकलाया स्वापुतिइ जनभावना पिब्वयेत महत्वपूर्ण भूमिका म्हितीगु अपेक्षा कयाच्वंगु दु ।

Categorized in राष्ट्रिय