२०७८ मङ्सिर २१, मंगलबार

​३५७ दँ पुलांगु अष्टमातृका गं प्याखं थुगुसी नं दित

लहनान्युज | कछलागा पारु ११४२, मंसीर ४ सनिवाः

स्वनिगः दुने थीथी द्यः प्याखंत जुइगु याः । मल्लकालीन सांस्कृतिक धरोहरया रुपय् दयाच्वंगु यलया गंप्याखं अथवा अष्टमातृका नाच दँय्दसं नःलास्वनेगु दिनंनिसें न्ह्यानाः एकादशीतक्क जुइगु याइ । थुगु प्याखं ने.स ७८४ इ मल्ल जुजु श्रीनिवास मल्लया पालय् न्ह्याःगु खः । शक्तिया उपासनालिसे सम्बन्धित थुगु प्याखनय् कुमार, भैरव, गणेश, वैष्णवी, सिंघीनी, व्याघ्रिणी, महाकालीलिसें १३ द्यःपिनि ख्वाःपाः अले व हे कथंया वसः तिसा तियाः मनूत मन्डालाकार दय्काः तान्त्रिक विधि कथं प्याखं हुली। परम्परागत बाजंगाजं लिसें द्यःपिं प्याखं हुहुं न्ह्याःवनेगु याइ। नेवाःतय् जक मखु, नेपाःया हे गौरवया रुपय् दयाच्वंगु थुकथंया प्याखं थुगुसी नं मजुइगु जूगु दु।
 
कोरोनाया कारण क्यनाः ३५७ दँ पुलांगु अष्टमातृका गं प्याखं थुगुसी नं मन्ह्याकीगु जुल। थगुने नं लकडाउनया हुनिं उगु प्याखं द्यूगु खः। थुगुसी मोहनिया झ्वलय् कोरोनाया हुनिं धार्मिक शुद्धि यानाः प्याखं न्ह्याकेमफूगु अष्टमातृका गं प्याखं सञ्चालन संरक्षण समितिया नायः राजेन्द्र शाक्यं धयादिल। थुगुसी प्याखं न्ह्याकेत स्थानीय प्रशासनं धाःसा छुं नं कथंया पंगः थंगु मदु।
 
कोरोना संक्रमणया जोखिम म्ह्वः जुयावंगुलिसें स्वनिगलय् परम्परानिसें न्ह्यानावयाच्वंगु धार्मिक व सांस्कृतिक पर्व निर्वाध न्ह्यानाच्वंगु दु व न्ह्याय्गु झ्वलय् नं दु। थज्याःगु इलय् समितिं थः यत्थे प्याखं दिकूगुयात थःगु सांस्कृतिक संवेदनाशीलप्रति न्याय मयाःगु रुपं स्थानीयं काःगु दु। स्थानीययापाखें सस्कृतिप्रेमीतय्सं यल महानगरपालिका, सम्बद्ध समितियात ज्ञापनपौ नं लःल्हाःगु दु।
 
स्वास्थ्य सुरक्षाया मापदण्ड पालना यासें ऐतिहासिक गं प्याखं न्ह्याकेगु निर्णय याय्गु अधिकार महानगरपालिकाय् निहित दुगुलिइ थुगुसी मयाय्गु निर्णयं नगरवासी तसकं दुःखित जूगु ज्ञापनपतिइ धयातःगु दु। ‘वर्तमान अवस्थाय् थज्याःगु सांस्कृतिक सम्पदायात निषेध यानाः न्ह्याःवनेत स्वय्गु समस्याया समाधान मखु। महानगरपालिकां थःगु स्रोत व साधनयात फक्व प्रयोग अले परिचालन यानाः प्याखं न्ह्याकेमाः’ ज्ञापनपौ लःल्हासें स्थानीयबासी समिनराज शाक्यं धयादिल।
 
२०४६ सालतक्क निरन्तर जूगु थुगु प्याखं वयां लिपा धाःसा गबलें आर्थिक संकट, गबलें व्यवस्थापन समितिया हुनिं दिना वयाच्वंगु दु। २०५४ सालनिसें २०६५ सालतक्क थुगु प्याखनं निरन्तरता काःगु खः। वयां लिपा नं प्यदँ द्यूगु खः।