२०७८ मङ्सिर २१, मंगलबार

नेवाः मन्त्रीतय्सं समुदायया न्हाय् धस्वाके फय्मा

लहनान्युज | कछलागा पारु ११४२, मंसीर ४ सनिवाः

धाधां करीब स्वला धुंकाः नेपाली काँग्रेस सभापति शेरबहादुर देउवा नेतृत्वया मन्त्रीमण्डलं पूर्णता काःगु दु । दलतय् दुने थः थः हे कचवं दुगु हुनिं मन्त्री जुइपिं हे क्वःछी मफयाच्वंगु अवस्थाय् ताःहाकःगु ई हे शेरबहादुर नेतृत्वया मन्त्रीमण्डलं पूर्णता काय् मफयाच्वंगु खः । आः स्वय्बलय् मन्त्रीमण्डल पूवंगु खनेदत । मन्त्रीमण्डलं पूर्णता काःगुलिसें नेवाःतय् दथुइ छगू आशा नं ब्वलंगु खनेदत सा न्ह्यसःत नं उलि हे दंगु खनेदत ।
 
देउवा नेतृत्वया मन्त्रीमण्डलय् प्यम्ह नेवाःत नं मन्त्री जूगु दु । नेवाः भाषा, साहित्य आन्दोलनय् तकं न्ह्यःने दयाच्वंम्ह जनता समाजवादी पार्टीया राजेन्द्र प्रसाद श्रेष्ठ संघीय मामिला तथा सामान्य प्रशासन मन्त्री जुयादीगु दुसा शशी श्रेष्ठया भागय् भूमि व्यवस्था, सहकारी तथा गरिबी निवारण मन्त्रालय लाःगु दु । अथे हे, कृष्ण कुमार श्रेष्ठ श्रम, रोजगार तथा सामाजिक सुरक्षा मन्त्री जूबलय् उमेश श्रेष्ठयात प्रधानमन्त्री तथा मन्त्रिपरिषद् कार्यालयया राज्यमन्त्री दय्कूगु दु । प्यम्ह प्यम्ह नेवाःत मन्त्रीमण्डलय् दुथ्याःबलय् नेवाः समुदायया लागिं उपिं मन्त्रीतय्सं छुं याइ, नेवाः मुद्दाय् सम्वोधन याइ धइगु आशा नेवाः समुदाय दुने ब्वलंगु दु।
 
विशेष यानाः भाषिक व जातीय अधिकार व समानताया हे सः ल्ह्वनावःम्ह राजेन्द्र प्रसाद श्रेष्ठप्रति ला झन अप्वः आशा दु । थ्वयां न्ह्यः नं वय्कलं शिक्षा विधयकय् संशोधन प्रस्ताव तयाः मातृभाषा शिक्षाया लँ चाय्कादीगु खः । आः वय्कःलिसें मेमेपिं नेवाः मन्त्रीतय्सं छु छु याइ धइगु अप्वःसिया च्यूताःया विषय जुयाच्वंगु दु ।
 
थज्याःगु आशाया नापं नैराश्यतां जाःगु विषय नं दनि । मन्त्री जुइपिं न्ह्याम्ह नं भ्रष्टाचारय् तक्यनेगु, खास हे उपलब्धीमूलक छुं हे ज्या मजुइगु जुयाच्वंगु अवस्थाय् नेवाः मन्त्रीतय्सं नं थज्याःगु हे पहः क्यनीगु जकं खःला धइगु आशंका जक मखु, आः थुपिं नं ध्यबा
जक नयाः ला च्वनीगु खः नि धकाः तकं सामाजिक संजालय् टिप्पणीत वयाच्वंगु दु । 
 
थ्व छगू ह्वःताः नं खः । नेवाःत मन्त्रीमण्डलय् खास हे दुथ्याइमखु । अप्वः यानाः खस ब्रम्हू अले क्षेत्रीत जक हे धइथें जुयाच्वनी । तर थुगु पालय् प्यम्ह नेवाःत दुथ्याःबलय् सकलें छगू हे कथं जुइमखु, देय्यात उच्च प्राथमिकताय् तयाः, जनता, समुदायया उन्नती, प्रगतियात बिचाः यानाः ज्या याइपिं नेतात नं दु, अले अज्याःपिं नेतात धइपिं नेवाःत हे खः धकाः प्रमाणित याय्गु बांलाःगु ह्वःताः नं खः । स्वय् ल्यं दनिगु धइगु वय्कःपिनिगु ज्या हे खः । आशा याय्, विश्वास काय्, वय्कःपिन्सं बांलाःगु लिच्वः बियादी । वय्कःपिन्सं समग्र नेवाः समुदायया न्हाय् धस्वाकादी । भिन्तुना दु, वय्कःपिं सकलसित, छिकपिनिगु ज्या, छिकपिनिगु कार्यकाल ताःलाय्मा, सकलसिगु नितिं दसु जुइमा।