नेपाल ओलम्पिक कमिटी (एनओसी) या अध्यक्ष जीवनराम श्रेष्ठयात ओलम्पिक काउन्सिल अफ एशिया (ओसिए) मेरिट अवार्ड छगु ज्याझ्वः दथुइ लःल्हागु दु।

यूएईया दुवईलय् जुयाच्वंगु ४० क्वःगु ओसिएया महासभाय् श्रेष्ठयात (ओसिए) मेरिट अवार्ड लःल्हागु खः। एनओसीया अध्यक्ष श्रेष्ठयात उगु ज्याझ्वलय् ओसिए मेरिट अवार्ड लःल्हागु दुवईलय् दीम्ह एनओसीया महासचिव निलेन्द्रराज श्रेष्ठं धयादिगु दु। ओसिएया महासभाय् थीथी देय्या शहरय् लिपा जुइगु एशियाली कासाःतयगु बारेय् सहलहलिसें प्रस्ततिकरण जूगु खः।

४० क्वःगु महासभाय् चिनया ह्याङझाउय् सन २०२२, जापानया आइची–नागोया २०२६, कतारया दोहा २०३० व साउदी अरवया रियाद २०३४ य् जुइगु एशियाली कासाःया आयोजकतय्सं प्रस्तुतीकरण याःगु दुसाः एशियाय् ओलम्पिक आन्दोलनयात कया नं विशेष सहलह जूगु एनओसीया महासचिव श्रेष्ठं धयादिगु दु।

अथेहे महासभाय् २०२२ य् जुइगु मेगु २ कासाःतय्गु आयोजकतपाखें प्रगति प्रतिवेदनयात कया नं सहलह जूगु दु। वइगु मार्चय् बैंकक व चोनबुरीइ ६ क्वःगु एसियाली इन्डोर व मार्सल आर्ट कासाः व डिसेम्बर २०२२ य् चीनया शान्ताउलय् ३ क्वःगु एसियाली युवा कासात जुइत्यगु दु।

४० क्वःगु ओसिएया महासभाय् ब्वति कायेत यूएईया दुवईलय् झापिं एनओसीया अध्यक्ष जीवनराम श्रेष्ठ व महासचिव निलेन्द्रराज श्रेष्ठ थौं सोमबाः स्वदेश लिहा झाइगु ज्याझ्वः दु।

Categorized in राष्ट्रिय