अन्तर व्यवस्थापिका संघ (आईपीयू) या १४३ क्वःगु सम्मेलनय् सहभागी जुइत सभामुख अग्निप्रसाद सापकोटा नेपाली प्रतिनिधिमण्डलया नेतृत्व यासे स्पेन प्रस्थान याउगु दु।

सभामुख सापकोटा नेतृत्वया नेपाली टोली बुधबाः बहनि ८ः५० बजे त्रिभुवन अन्तर्राष्ट्रिय विमानस्थलपाखे उखे प्रस्थान याउगु दु। सभामुखनाप प्रतिनिधि सभा सदस्य देवप्रसाद गुरुङ, लक्ष्मीकुमारी चौधरी, राष्ट्रियसभा सदस्य प्रमिला कुमारी व अगमप्रसाद वान्तवा राईपि उखेपाखे वंगु खः।

अथेहे प्रतिनिधिमण्डलय् संघीय संसदया महासचिव डा भरतराज गौतम, प्रतिनिधसभाया सचिव गोपालनाथ योगी, सभामुखया प्रमुख स्वकीय सचिव अर्जुन खत्री के.सी, कम्प्युटर अधिकृत सुरेशराज सेढाईँ व स्पेनया नेपाली राजदूतावासया कार्यवाहक राजदूत अर्जुन अधिकारी सहभागीपि दुगु खः।

अन्तर व्यवस्थापिका संघ (आईपीयू) व स्पेनया संसदय् थ्व हे मंसिर १० निसे १४ गते तक स्पेनया म्याड्रिडय् १४३ क्वःगु आईपीयू सम्मेलन जुइत्यंगु खः। सम्मेलनय् सभामुख सापकोटां २८ नोभेम्बरय् जुइगु बैठकय् सम्बोधन यायेगु ज्याझ्वः दु।

Categorized in राष्ट्रिय