अमेरीकाय् च्वनाच्वम्ह साहित्यकार रीतादेवी प्रधान रूमाठया हाइकु बांलूगु चिनाखं व बाखं विधाया निगु सफू छगु ज्याझ्वः दथुइ पितब्बज्या जुगु दु।

उगु ज्याझ्वलय् प्रधानया फय् वःगु लँय् व तापालय् थ्वःगु सः नांयागु सफूया पितब्वज्या जूगु खः। ज्याझ्वः सिर्जना अभियान समाज व नेवाः हाइकु ख्यःया ग्वसालय् जूगु खः।

प्रधानया हाइकु बांलूगु चिनाखं सफू फय् वःगु लँय् व बाखं मुनाः तापालय् थ्वःगु सःया पितब्वज्या बाङ्मय् शताब्दी पुरूष सत्यमोहन जोशी, नेपाल प्रज्ञा प्रतिष्ठानया प्राज्ञ साहित्यकार ध्रुव मधिकःमि व गीता खत्रीं मंकाः कथं पितब्वज्या यानादीगु खः।

हाइकु ख्यःया अध्यक्ष सुरेश प्रधानया सभाध्यक्षताय् जूगु ज्याझ्वलय् बाङ्मय् शताब्दीपुरूष जोशी, नेपालभाषा एकेडेमीया दांभरी डा पुष्पराज राजकर्णिकार, प्राज्ञ मधिकःमि, शाक्य सुरेन, समालोचक पूर्ण ताम्राकार, नेवाः हाइकु ख्यःया कजि दिल बहादुर चित्रकार तूयुपुं, अनेसासया अध्यक्ष खत्री साहित्यकार प्रधानया पितब्वज्या जूगु निगू सफूयात कया थःथःगु धारणा तयादीगु खः।

ज्याझ्वलय् साहित्यकार प्रधानं भर्चुयल माध्यमं थःगु कृतियात कया नवानादीगु खःसा ज्याझ्वः साहित्यकार पूर्णिमा शाक्य न्ह्याःकादीगु खः।

Categorized in राष्ट्रिय