२०७८ मङ्सिर २२, बुधबार

कीर्तिपुर आइडल ११४२ या निगूगु चरणया थौं धेंधेंबल्ला जुइगु

लहनान्युज | कछलागा सप्तमी ११४२, मंसीर १० शुक्रवाः

किपू नगरपालिकाया ग्वसालय् किपू नगर दुनेया १५ दँनिसें ३० दँदुपि न्हूपिं प्रतिभापिनिगु कीर्तिपुर आइडल ११४२ या निगूगु चरणया धेंधेंबल्ला कथं थौं शुक्रवाः न्हिनसिया २ ता इलय् कराओके राउण्ड कासा जुइगु जूगु दु।

किपूया २ वडा द्यःध्वाखा न्याम्हासिमा लागाय् च्वंगु नेपालभाषा एकेदेमिया हलय् जुइगु उगु कराओके कासाय् मुक्कं १९ म्ह कासामिपिं दुथ्याःगु जूसां छम्ह कासामि विदेशय् वनेधुंकूगुलिं आः १८ म्ह कासामिपिन्सं थःथःगु प्रतिभा न्ह्यब्वइगु जूगु दु।कन्हय् शुक्रवाः जुइगु निगूगु चरणया कराओके राउण्ड कासाय् १८ म्ह कासामिपिंमध्ये पाखें टप टेन कथं १० म्ह कासामिपिं ल्यइगु जूगु दुसा च्याम्ह कासामिपिं आउट जुइ।

टप टेन कथं ल्यंपिं झिम्ह कासामिपिनिगु दथुइ कीर्तिपुर सिंगिङ आइडल ११४२ या ग्राण्ड फिनाले कथं लाइभ बाजाय् कासामिपिन्सं म्ये हालेमाःगु दकले लिपांगु कासा जुइ। कीर्तिपुर सिंगिङ आइडल ११४२ य् न्हाप लाःम्ह प्रतिभा कलाकारयात न्ययद्वः तका दांया सिरपाःलिसें मेडल ट्रफी लःल्हाइगु जूगु दुसा ल्यू लाःम्हेसित पीद्वः तका दांया सिरपाःलिसें मेडल ट्रफी लिसें लियांल्यू लाःम्हेसित स्वीद्वः तका दांया सिरपाः व मेडल ट्रफी लःल्हायेग खः।

Categorized in मनोरन्जन