प्रकाशमान सिंहया प्यानलय् सभापतिइ कृष्ण बानियाँ
लहनान्युज | कछलागा अष्टमी ११४२, मंसीर ११ सनिवाः
नेपाली कांग्रेसया १४ क्वःगु महाधिवेशन अन्तर्गत येँ जिल्ला समितिया लागि प्रकाशमान सिंह व गगन थापाया मंकाः प्यानल घोषणा याउगु दु।
सिंह व थापा समूहपाखे वर्तमान सभापति कृष्ण (सबुज) बानियाँयात हे निरन्तरता बिउगु दु। अथेहे उपसभापतिइ गोकर्ण केसी व राजकुमार नकर्मी उम्मेदवार जुगु दु। थौं घोषणा जुगुलि सिंह–थापा समूहपाखे सचिवय् इन्द्र थापा व गोविन्द पुडासैनीं उम्मेदवारी बिउगु दु।
अथेतु, सहसचिवय् प्रा.डा. अमिता प्रधान व रोमेल श्रेष्ठयात न्ह्यने हःगु दु। येँ जिल्लाय् थौं मनोनयन दर्ता जारी दु। कन्ह्य सुथय् ८ बजे जिल्ला अधिवेशनया उलेज्या राष्ट्रिय सभागृहय् जुइ। कन्ह्य हे १० बजे मतदान प्रक्रिया सुरु जुइ। थ्व स्वया न्ह्यः जिल्ला अधिवेशनया लागि संस्थापन टिमं कृष्ण सिटौला समूहनाप मिले जुया उपेन्द्र कार्कीयात सभापतिइ न्ह्यने हःगु खः।
Categorized in राष्ट्रिय