वल्र्ड नेवाः अर्गनाइजेसन (डब्लुएनओ) या ग्वसालय् जूगु हलिं नेवाः न्ह्यसः लिसः कासाःया त्याकामिपिन्त सिरपा लःल्हाःगु दु ।

येँ चागःस्थित जगत सुन्दर ब्वनेकुथिइ शनिबाः छगू ज्याझ्वः यासें सिरपा लःल्हागु खः । ज्याझ्वलय् न्ह्यसः लिसः कासाय् न्हाप लाःगु यलबुकः स्वां पुचःयात ६०० अमेरिकी डलर, ल्यू लाःगु गुलाफ स्वां पुचःयात ४५० अमेरिकी डलर, लियांल्यू लाःगु सिन्हःस्वां पुचःयात ३०० अमेरिकी डलर व हःपाः लाःगु अजूस्वां पुचःयात १५० अमेरिकी डलर सिरपा कथं लःल्हागु खः।

अथेहे कासाय् ब्वति काःगु फुक्कं पुचःयात १५ अमेरिकी डलर नं लःल्हाःगु खः । वंगु भाद्र ५ निसें न्ह्याःगु कासाय् थीथी देय्या २० पुचलं ब्वति काःगु खसाः सेमिफाइनल न्ह्यःतकया ९ कासा भर्चुअल रूपं जूगुलिइ वयां लिपाया ३ कासा जुममार्फत भच्र्युअल नापं भौतिक रुपं नं जूगु खः।

ज्याझ्वलय् संघीय मामिला तथा सामान्य प्रशासनमन्त्री राजेन्द्र प्रसाद श्रेष्ठ, येँ महानगरपालिकाया उपमेयर हरिप्रभा खड्गी, नेवाः न्ह्यलुवाःलिसें परोपकार संस्थाया नायः हितकरवीर सिहं कसाः, नेवाः न्ह्यलुवाःलिसें साहित्यकार मल्ल के सुन्दर, नेवाः देय् दबुया अध्यक्ष नरेश ताम्राकार, डब्लुएनओ नेपाः च्याप्टरया पूर्व नायः पुष्कर भक्त माथेमा, कवियत्री प्रतिसरा सायमिलिसेंया थःथःगु बिचाः तयादीगु खः।

अथे हे, कासाया कजि विमलमान श्रेष्ठ, न्ह्यसः निर्माण कमितिया कजि केशरमान ताम्राकार, डब्लुएनओ नेपाः च्याप्टरया नायः शाक्य सुरेनं कासाया बारे नवानादीगु खः । वाङ्मय शताब्दी पुरूषलिसें डब्लुएनओया सल्लाहकार सत्यमोहन जोशीं भच्र्युअल रुपं उपस्थित जुयाः भिन्तुना हसना बियादीगु खः।

ज्याझ्वलय् क्यानेडापाखें सितार वादनया प्रस्तुति नं जूगु खःसा नेपालं उस्ताद यसराज सुदर्शन राजोपाध्यायं सरोद वादन यानादीगु खः।

Categorized in राष्ट्रिय