ज्यापु दिवस १८ क्वःगु समारोह समितिइ ग्वय्दां तयेत प्रधानमन्त्री निवासय् थ्यंगु दु।

ज्यापु दिवसया लागि ग्वय्दां तयेत ग्वसाःखलः ज्यापु संस्कृति विकास कोषलिसें कजि गोफः त्वाः माकः गल्ली ज्यापु समाजया पदाधिकारीपि प्रधानमन्त्री निवास बालुवाटारय् वंगु खः।

अथेहे प्रधानमन्त्री देउवायात मूपाहाँ जुइगु वयेगु लागि कोषया अध्यक्ष मंगलकृष्ण सिं ब्वनाःदीगु खः। कोषया उपाध्यक्ष सन्तकुमार महर्जनं दँय् दसं सार्वजनिक बिदा बियावयाच्वंगु योमरीपुन्हि÷ज्यापु दिवसया पर्व बिदा निदँ न्हय् निसें सम्बन्धित जातियात जक बिइगु निर्णययात सार्वजनिक विदाय् परिणत यायेत प्रधानमन्त्री समक्ष इनाप यानादीगु खः।

थीथी समुदायं थःथःथगु भाय्, भेष–भुषा, सम्पदा, संस्कृति ल्यकेमाःगुलिं बः बिसें प्रधानमन्त्री देउवां स्वनिगःया सम्पदा व संस्कृतिया संरक्षण व प्रवद्र्धनय् आदिवासी जनजाती ज्यापु समुदायया तधंगु योगदान दुगु धयादिल। वइगु पुष ४ गते योमरी पून्हिलिसें ज्यापू दिवस लाःगु दु।

Categorized in राष्ट्रिय